चैत २१, काठमाडौं । बतास समूह अन्तर्गत रहेको होटल आनन्द प्रालिले कानून बमोजिम पशुपति क्षेत्र विकास कोषसँग होटलस्तरमा धर्मशाला सञ्चालन गर्ने सम्झौता गरी सोही अनुरूप सञ्चालन गर्दै आएको बताएको छ ।
उक्त समूहले सहमति र स्वीकृति भए बमोजिम २५ करोड रुपैयाँभन्दा माथि लगानी गरी होटल सञ्चालन भएको बताउँदै कोरोना महामारीको कारण होटल व्यवसाय धराशायी भएको समयमा समेत २०७९ वैशाख मसान्तसम्मको सम्झौता बमोजिमको बहाल रकम बुझाई सकेको स्पष्ट गरेको छ ।
समूहकातर्फबाट सोमवार विज्ञप्ति जारी गर्दै होटल आनन्द प्रालिले नेपाल- भारत मैत्री पशुपति धर्मशालाका सम्बन्धमा विगत केही महीनादेखि विभिन्न प्रकारका सार्वजनिक टिप्पणीहरु हुँदै आएको बताएको छ ।
विज्ञप्तिमा गत चैत्र १७ गते नेपाल- भारत मैत्री पशुपति धर्मशालाको प्रांगणमा जिम्मेवार सरकारी निकायबाट भएको आपत्तिजनक गतिविधिले नेपालको कानूनी शासनको नै धज्जी उडाउने, धर्मशालामा आश्रय लिइरहेका धर्मावलम्बीलाई त्रसित पार्ने काम भएको उल्लेख छ ।
प्रधानमन्त्री शेरबहादुर देउवाको भारत भ्रमणको पुर्वसन्ध्यामा भारत सरकारको सहयोगमा निर्मित धर्मशालालाई केन्द्रमा राखेर वितण्डा मच्चाउने काम भएको भन्दै विज्ञप्तिमा नेपाल- भारत सम्बन्धमा नै खलल पुर्याउन उद्धत हुने, नेपाली व्यवसायीलाई हतोत्साहित गर्ने र नेपालको पर्यटन क्षेत्रलाई नै गम्भीर असर पुग्ने गरी विदेशी पाउनालाई असुरक्षित महसुस गराउने काम भएको उल्लेख छ।
विज्ञप्तिमा राज्य शक्तिको दुरुपयोग गर्दै नेपाल- भारत मैत्री पशुपति धर्मशालाका सम्बन्धमा आम नागरिकलाई भ्रममा राख्ने कामलाई भने पशुपति विकास कोष र जिम्मेवार मन्त्रीबाट जारी नै रहेको भन्दै पछिल्ला दिनहरूमा विकसित घटनाक्रमको विवरण सार्वजनिक गर्न पनि माग गरिएको छ ।
