काठमाडौं । दोल्ती पावर कम्पनी लिमिटेडले सर्वसाधारणमा सार्वजनिक निष्कासनमार्फत विक्री गरेको आईपीओ वैशाख ८ गते शुक्रवार बाँडफाँट गर्दै छ ।
एनआईसी एशिया क्यापिटल लिमिटेडले दिउँसो ३ बजे काजीको किचेन बत्तिसपुतली, काठमाडौंमा आईपीओ बाँडफाँट गर्ने जानकारी दिएको हो । कम्पनीले सर्वसाधारणमा चैत २८ गतेदेखि वैशाख ३ गतेसम्म आईपीओ विक्री गरेको थियो ।
सर्वसाधारणमा विक्री गरिएको १२ लाख ७१ हजार ८६१ कित्ता कम्पनीको आईपीओ खरीदका लागि १३ लाख ३९ हजारभन्दा बढीले १ करोड ४७ लाखभन्दा बढी कित्ता शेयर खरीद माग गरेका छन् । मागभन्दा बढी आवेदन परेकाले कम्पनीको आईपीओ गोलाप्रथाको माध्यमबाट बाँडफाँट हुनेछ । १ लाख २७ हजार १८६ जना आवेदकले १० कित्ताका दरले यो शेयर प्राप्त गर्नेछन् । बाँकी एक कित्ता शेयर भने यीमध्येकै एक जनामा थप हुनेछ ।
कम्पनीले जारी पूँजी ५३ करोड ६४ लाख ८६ हजार रुपैयाँको ३० प्रतिशत दरको १६ लाख ९ हजार ४५८ कित्ता शेयर आयोजना प्रभावित स्थानीयसहित सर्वसाधारणमा जारी गर्न नियामक निकाय नेपाल धितोपत्र बोर्डबाट अनुमति पाएको थियो । पहिलो चरणमा आयोजना प्रभावित स्थानीयमा १ लाख ४१ हजार ८२० कित्ता र वैदेशिक रोजगारीमा रहेका नेपालीमा १ लाख ७ हजार २९८ कित्ता शेयर बाँडफाँट भइसकेको छ ।
स्थानीयका लागि कम्पनीले ५ लाख ३६ हजार ४८६ कित्ता शेयर विक्री खुला गरेको थियो । स्थानीयमा वितरण हुन नसकेको बाँकी शेयरसमेत सर्वसाधारणमा थप गरी विक्री गरिएको हो । कम्पनीका कर्मचारीका लागि छुट्याइएको शेयरसमेत बाँडफाँट गरिसकेको कम्पनीले सामूहिक लगानी कोषका लागि ६८ हजार १७ कित्ता शेयर सुरक्षित गरेको छ ।
कम्पनीले दैलेख जिल्लामा ४ दशमलव ५ मेगावाट क्षमताको पदम खोला साना जलविद्युत आयोजना निर्माण सम्पन्न गरी व्यापारिक उत्पादन गर्दै आएको छ । २०७७ साल फागुन ८ गतेदेखि व्यापारिक उत्पादन गर्ने मिति तय गरिएको उक्त आयोजनाबाट निर्धारित अवधिभन्दा अगावै २०७६ साल पुस ८ गतेदेखि व्यापारिक उत्पादन शुरू गर्न कम्पनी सफल भएको हो ।
४ दशमलव ५ मेगावाट क्षमताको पदम खोला जलविद्युत आयोजनाको कुल निर्माण लागत रू. १ अर्ब ८ करोडभन्दा बढी रहेको छ भने प्रतिमेगावाट लागत रू. २४ करोड ५ लाखभन्दा माथि रहेको छ । यस आयोजनको विद्युत् उत्पादन अनुमतिपत्र बहाल रहने अवधि २१०९ साल असोज २८ गतेसम्म रहेकाले अझै ३० वर्ष बाँकी रहेको छ ।
सूचना हेर्न यहाँ क्लिक गर्नुहोस्
