काठमाडौं । साताको तेस्रो कारोबार दिन मंगलवार नेप्से परिसूचक सामान्य अंकले बढेको छ । नेप्से परिसूचक १ दशमलव ८५ अंक बढेर १ हजार ९५३ दशमलव शून्य ६ विन्दुमा पुगेको हो ।
मंगलवार बजार केही सम्हालिन खोजेको देखिन्छ । वाणिज्य बैंकसहित विकास बैंक र वित्त कम्पनीहरूले चैत महीनामा ब्याजदर घटाउने निर्णय गरेकाले शेयर बजारमा सकारात्मक प्रभाव परेको देखिन्छ । घटबढ भइरहने बजारमा लगानी गर्नुपूर्व बजारको ट्रेण्ड, कम्पनीका आधारभूत र प्राविधिक पक्ष हेरेर लगानी गर्न विश्लेषकहरू सुझाउँछन् ।
यस दिन कारोबारमा आएका २५५ धितोपत्रको ३३ लाख १८ हजार १०८ कित्ता २६ हजार ४७३ पटकमा रू. १ अर्ब १३ करोड बराबर कारोबार भएको छ । यो पछिल्लो समय पुस ७ गते भएको १ अर्ब ५ करोड रुपैयाँपछिकै सबैभन्दा न्युन कारोबार रकम हो । कारोबारमा आएका धितोपत्रमध्ये युनिक नेपाल लघुवित्त वित्तीय संस्थाको शेयर मूल्य १० प्रतिशत वृद्धि भई प्रतिकित्ता रू. १ हजार ३२५ दशमलव ९० पुगेको हो । दोस्रोमा शुभम पावरको शेयर मूल्य ९ दशमलव ९८ प्रतिशत वृद्धि भई रू. ४२६ दशमलव ५० पुगेको छ ।
मंगलवार एनआईसी एशिया ब्यालेन्स्ड फण्डको इकाई मूल्य सबैभन्दा बढी ५ दशमलव ६४ प्रतिशत घटेर रू. ८ दशमलव २० मा झरेको छ । त्यस्तै दोस्रोमा सपोर्ट माइक्रोफाइनान्स लघुवित्त वित्तीय संस्थाको शेयर मूल्य ३ दशमलव ९२ प्रतिशत घटेर रू. ९७८ दशमलव १० कायम भएको छ ।
यस दिन एनआईसी एशिया बैंकको सर्वाधिक शेयर खरीदविक्री रू. १० करोड ४८ लाख बराबर भएको छ । कम्पनीको शेयर मूल्यप्रतिकित्ता रू. ७६४ कायम भएको छ । त्यस्तै सर्वाधिक शेयर खरीदविक्री हुने दोस्रोमा नबिल बैंकको रू. ३ करोड ४४ लाख बराबर कारोबार भएको हो ।
कारोबारमा आएका १३ समूहगत परिसूचकमध्ये पाँच समूहको परिसूचक घटेको छ भने बाँकीको बढेको छ । सबैभन्दा बढी व्यापार समूहको परिसूचक २ दशमलव ३८ प्रतिशत घटेको छ । सबैभन्दा बढी वित्त समूहको शून्य दशमलव ९८ प्रतिशत वृद्धि भएको छ ।
