काठमाडौं । लगातार तीन कारोबार दिन बजार बढेको छ । तीन कारोबार दिनमा नेप्से परिसूचक ६१ अंक बढेको हो । साताको पहिलो कारोबार दिन आइतवार नेप्से परिसूचक १४ दशलमव ८१ बढेर २ हजार ८० दशमलव ८६ विन्दुमा पुगेको छ ।
मौद्रिक नीति सार्वजनिकपछि लगातार घटेको बजार ट्रेडरहरू सक्रिय हुन थालेका छन् । सोही कारण बजारसँगै कारोबार रकम पनि बढ्न थालेको छ ।
पछिल्लो समय बैंक तथा वित्तीय प्रणालीमा तरलता सहज भएसँगै ब्याजदर घट्न थालेको छ । यसकारण बैंकहरूले अब शेयर धितो कर्जा दिने घोषणा गर्न थालेका छन् । गएको साता मात्रै एनआईसी एसिया बैंकले शेयर धितो कर्जा उपलब्ध गराउने घोषणा गरेको छ । नेपाल बैंकले यसअघि नै शेयर कर्जा दिने बताएको थियो । यसआधारमा अरु बैंकहरुले पनि यस्तो कर्जा सहज तरिकाले उपलब्ध गराउने अनुमान गर्न थालिएको छ ।
नेपाल राष्ट्र बैंकले ५० लाखसम्मको कर्जामा जोखिमभार १०० प्रतिशत मात्र कायम गरेकाले पनि बैंकहरू अब क्रमशः शेयर धितो कर्जातर्फ आकर्षित हुन सक्ने जानकारहरू बताउँछन् ।
आइतवार सेन्सेटिभ इन्डेक्स शून्य दशमलव ९९ प्रतिशत, फ्लोट इन्डेक्स शून्य दशमलव ८३ प्रतिशत र सेन्सेटिभ फ्लोट इन्डेक्स १ दशमलव १३ प्रतिशत वृद्धि भएको छ ।
यस दिन कारोबारमा आएका २७१ धितोपत्रको ९७ लाख १८ हजार ७५४ कित्ता शेयर ९५ हजार ९६५ पटकमा रू. ३ अर्बभन्दा बढीको शेयर कारोबार भएको छ । कारोबारमा आएका धितोपत्रमध्ये थ्री स्टार हाइड्रोपावरको शेयर मूल्य सबैभन्दा बढी १० प्रतिशत वृद्धि भएको छ । शेयर मूल्य प्रतिकित्ता रू. २८० दशमलव ५० पुगेको हो ।
शेयर मूल्य सर्वाधिक बढ्ने कम्पनीको सूचीमा दोस्रोमा अप्पर स्याङ्गे हाइड्रोपावर छ । कम्पनीको शेयर मूल्य ९ दशमलव ९८ प्रतिशत बढेर २७८ दशमलव ९० पुगेको छ ।
यी दुवै कम्पनी धितोपत्रको दोस्रो बजारमा आजदेखि नै कारोबारमा आएका हुन् । यसकारण यी कम्पनीको शेयरमा खरीदकर्ता आकर्षित भएको जानकार बताउँछन् ।
आइतवार सबैभन्दा बढी घोराही सिमेन्ट इण्डष्ट्रीका शेयरधनीले गुमाएका छन् । यस कम्पनीको शेयर मूल्यमा नेगेटिभ सर्किट लागेसँगै धेरै गुमाएका हुन् । कम्पनीको शेयर मूल्य प्रतिकित्ता रू. ५०९ मा झरेको छ । कम्पनीको शेयर धितोपत्रको दोस्रो बजारमा आज (आइतवार)देखि आएको हो ।
कम्पनीको शेयरमा क्रेताभन्दा विक्रेता हाबी भएसँगै शेयर मूल्य घटेको छ । शेयर मूल्य घट्ने दोस्रोमा अभियान लघुवित्त वित्तीय संस्थाको शेयर मूल्य ७ दशमलव १८ प्रतिशत घटेर ७२४ मा झरेको छ ।
सर्वाधिक शेयर खरीदविक्री नेपाल इन्स्योरेन्सको संस्थापक शेयरको भएको छ । कम्पनीको रू. ५८ करोड ४५ लाख बराबरको संस्थापक शेयरको कारोबार भएको हो । त्यस्तै सर्वाधिक शेयर खरीदविक्री हुने दोस्रोमा घोराही सिमेन्टको रू. २३ करोड १५ लाख बराबरको भएको छ ।
कारोबारमा आएका १३ समूहगत परिसूचकमध्ये चार समूहको परिसूचक घटेको छ भने व्यापार समूहको परिसूचक स्थिर छ बाँकी सबै समूहको परिसूचक बढेको छ । समूहगत परिसूचक बढ्नेमा सबैभन्दा बढी निर्जीवन बीमा समूहको परिसूचक २ दशमलव २१ प्रतिशत बढेको छ ।
