सोलुखुम्बु । मंगलबार बहराइनका राजपरिवारसहित एकै दिन करिब ८० जनाले विश्वको सर्वोच्च शिखर सगरमाथा आरोहण गरेका छन् ।
पर्यटन विभागका निर्देशक मीरा आचार्यका अनुसार मंगलबार बिहान ६ः४० बजे बहराइनका राजकुमार शेख मोहम्मद अल खलिफासहितको टोली सगरमाथाको शिखरमा पुग्न सफल भएको हो ।
‘खलिफासहित टोलीका १६ मध्ये १२ सहित अन्य करिब ८० जना सगरमाथाको शिखर पुगेका छन्’, आधारशिविरमा रहेकी विभागका निर्देशक आचार्यले टेलिफोन सम्पर्कमा भनिन्, ‘आरोहण टोलीसँग राम्रो टेलिफोन सम्पर्क हुन सकिरहेको छैन त्यसैले यो संख्यामा थपघट हुन सक्छ ।’
स्वदेशी तथा विदेशी आरोहीले मंगलबार बिहान ५ बजेदेखि सगरमाथाको शिखरमा पाइला टेक्न सफल भएको उनको भनाइ छ । ‘१३ मेसम्मको मौसम आरोहणका लागि अनुकूल देखिन्छ’, अधिकृत आचार्यले भनिन्, ‘त्यसबेलासम्म करिब २०० आरोहीले सगरमाथा आरोहण गर्ने अनुमान छ ।’ वसन्त यामको सगरमाथा आरोहण वैशाख २४ गते देखि सुरु भएको थियो । कीर्तिमानी आरोही कामीरिता शेर्पाको नेतृत्वमा गएको १२ जना शेर्पा टोलीले शिखर जाने बाटो बनाउँदै चुचुरोमा पुगेपछि आरोहण सुरु भएको विभागले जनाएको छ । रासस
