म्याग्दी । बेनी–जोमसोम–कोरला सडक आयोजना निर्माणमा भएको ढिलासुस्तीप्रति राष्ट्रियसभाका अध्यक्ष गणेशप्रसाद तिमिल्सिनाले चासो देखाएका छन् । चीन र भारतलाई जोड्ने सबैभन्दा छोटो दूरीको कालीगण्डकी कोरिडोरअन्तर्गत म्याग्दी र मुस्ताङ खण्डमा सडक निर्माणको अनुगमनमा सोमवार मुस्ताङ पुगेका अध्यक्ष तिमिल्सिनाले ढिलासुस्तीप्रति असन्तुष्टि व्यक्त गरेका हुन् ।
अध्यक्ष तिमिल्सिना बेनी–जोमसोम खण्डमा भइरहेको सडक निर्माणको अवस्थाका बारेमा आयोजनाका अधिकारीसँग जानकारी लिएर कोरला नाकातर्फ प्रस्थान गरेका छन् । विसं २०७३ देखि सुरु भएको १८६ किलोमिटर दूरीको बेनी–जोमसोम–कोरला सडक आयोजनाको ११ मध्ये ६ ओटा प्याकेजमात्र निर्माण सकिएको छ । आयोजनाका अधिकारीहरूले जोमसोम–कागबेनी सडक कालोपत्र हुन लागेको, बेनी–जोमसोम सडकको तेस्रो प्याकेज कैकुखोला–खन्ती खण्ड कालोपत्र अन्तिम चरणमा रहेको र तीनओटा प्याकेजको काम भइरहेको जानकारी गराए । पच्चीस किलोमिटर दूरीको चराङ–छोसेर खण्डको सडक निर्माणमा भएको ढिलाइ भएको छ ।
सडक तयार भएसँगै कोरला नाका सञ्चालन गर्ने तयारीसहित पूर्वाधार निर्माण सुरु गरिने अध्यक्ष तिमिल्सिनाले बताए । जोमसोममा पत्रकारसँग कुराकानी गर्दै उहाँले कोरला नाकामा भन्सार, क्वारेन्टाइन, सुक्खा बन्दरगाह र सुरक्षा चेक पोष्टलगायत पूर्वाधार निर्माणका लागि चालु वर्षभित्रै वातावरण अध्ययन प्रतिवेदन (इआइए) र विस्तृत परियोजना प्रतिवेदन (डिपिआर)को काम पूरा हुने जानकारी दिए । रासस
