सुनसरी (अस) । इटहरी उपमहानगरको सबैभन्दा ठूलो योजनाअन्तर्गत कोल्ड स्टोरसहितको आधुनिक कृषि बजार निर्माण हुने भएको छ । इटहरी–९ हाटखोलामा निर्माण हुने कृषि बजारको उपमहानगर प्रमुख द्वारिकलाल चौधरी र उपप्रमुख लक्ष्मी गौतमले शिलान्यास गरे ।
इटहरी उपमहानगरका वरिष्ठ इन्जिनियर जीवन घिमिरेका अनुसार २५ करोड ६ लाख ५ हजारको लागतमा कोल्ड स्टोरसहितको कृषि वजार निर्माण हुनेछ । कृषि बजारमा ६ लाख केजी सामग्री एकै पटक भण्डारण गर्न सकिने कोल्ड स्टोर रहनेछ । तरकारी र फलफूलजन्य सामग्री बिक्री कक्ष, एटीएम लाउन्ज, प्रशासनिक भवन, आवास कक्ष, दुई वटा धर्मकाँटा, १० वटा थोक बिक्री कक्ष निर्माण गरिनेछ । कृषि बजार निर्माण गर्न यो वर्ष संघीय सरकारले २ करोड २९ लाख अनुदान पठाएको उपमहानगर प्रमुख चौधरीले बताए ।
दुई वर्षमा निर्माण सकिने कृषि वजारका लागि क्रमागत बजेट उपलब्ध हुनेछ । उपमहानगरबाट ५० प्रतिशत सहभागिता रहनेछ भने यो वर्ष प्रदेश सरकारले १ करोड उपलब्ध गराएको छ । कार्यक्रममा उपमहानगर प्रमुख चौधरीले जनप्रतिनिधिको पहल र जनताले गाँस काटेर बुझाएको करबाट इटहरीमा विकास निर्माणले गति लिएको बताए । पूर्वाधार निर्माणमा नगरपालिकाको योगदानले इटहरीमा ठूलो परिवर्तन आएको उनको दाबी छ ।
