फागुन ७, काठमाडौं । नेपाल उद्योग वाणिज्य महासंघले करीब ४९ लाख सर्वसाधारण जोडिएको शेयर बजार कर्जामा गरिने कडाइले मूलतः साना लगानी प्रभावित हुनेतर्फ राष्ट्र बैंकको ध्यानाकर्षण गराएको छ ।
महासंघले शनिवार जारी गरेको विज्ञप्तिमा निक्षेपको ब्याज दर बढाउँदा बैंक वित्तीय संस्थामा रकम बढ्न नसकेको पछिल्लो ६ महीनाको अवस्था ज्ञात हुँदाहुँदै कर्जाको ब्याज दर बढाउनेतर्फ मौद्रिक नीतिको समिक्षा केन्द्रित हुँदा पूँजीको लागत थप बढन गई व्यवसायी र वित्तीय संस्थामा समेत समस्या देखिने सम्भावना बढेको उल्लेख गर्दै निक्षेप नबढनुका साथै कर्जा निक्षेप अनुपात तोकिएभन्दा माथि रहेको अवस्थामा बैंक दरमा गरिएको दुई प्रतिशत बिन्दुको वृद्धिले कर्जासमेत महंगिने उल्लेख छ ।
कोभिड - १९ महामारीको तीन ओटा लहरसँग जुध्दै अर्थतन्त्र सुधारोन्मुख रहेका बेला अर्धवार्षिक समिक्षाले आर्थिक गतिविधि प्रभावित हुने देखिएको भन्दै महासंघले
मौद्रिक नीतिको अर्धवार्षिक समिक्षाले उत्पादनमूलक उद्योगलाई कम ब्याज दरमा कर्जा उपलब्ध गराउन अध्ययन गर्ने बिषयले औद्योगिकरणमा सहयोग पुग्ने देखिए पनि निजी क्षेत्रका अधिकांश सुझाव सम्बोधन नभएकाले व्यापार / व्यवसाय एवं लगानी प्रभावित हुने बताएको छ ।
बढदो आयात निरुत्साहित गर्न नीति केन्द्रित हुँदा यसले उत्पादन, मूल्य वृद्धि, राजस्व र रोजगारीमा नकारात्मक असर पर्नेतर्फ पनि उसले केन्द्रीय बैंकको ध्यानाकर्षण गराएको छ ।
महासंघले कोभिड - १९ महामारीका कारण संकटमा परेको व्यवसाय पुनरुत्थानका लागि पुनर्कर्जा, पुर्नतालिकीकरण र पुर्नसंरचनामार्फत राहत दिएको कन्द्रीय बैंकले तेस्रो लहरको प्रभाव कायमै रहेका बेला पुनर्कर्जाको ब्याजदरसमेत बढाइदिंदा विशेषगरि साना तथा मझौला उद्यमी प्रभावित हुने दावी गरेको छ ।
महासंघले मौद्रिक नीतिको समिक्षामा ट्रष्ट रिसिटलगायतका आयात कर्जा, व्यक्तिगत अधिविकर्ष कर्जा, जग्गा प्लटिङसम्बन्धी रियल इस्टेट कर्जा, व्यक्तिगत हायर पर्चेज कर्जा तथा मार्जिन प्रकृतिको कर्जाको जोखिम भारमा पुनरावलोकन गरिने भन्ने उल्लेख छ रहेको भन्दै नीतिको रुझान हेर्दा यी प्रकृतिका कर्जामा कडाइ गर्ने गरि ब्याजदर वृद्धिलगायतका उपाय अवलम्बन हुने देखिएको बताएको छ ।
भारतबाट क्रेडिट सुविधामा वस्तु आयात गर्न सकिने विद्यमान व्यवस्थामा पुनरावलोकन गरिने भन्ने बुँदाले पनि भारतबाट हुने आयातमा कडाई गरिने संकेत गरेको भन्दै उसले निर्यात प्रवर्द्धन र मुलुकभित्र रकम भित्र्याउन अन्य उपाय अवलम्बन नगरि आयात घटाउने उपाय अबलम्बन गरिंदा यसले अनधिकृत व्यापार बढनुका साथै मूल्यसमेत अकासिने बताएको छ ।
महासंघको सुझाव बमोजिम उत्पादनमूलक उद्योगलाई अन्य व्यवसायभन्दा कम ब्याजदरमा कर्जा उपलब्ध गराउने गरि अध्ययन गर्ने भनि समिक्षामा उल्लेख हुनु स्वागतयोग्य रहेको भन्दै उसले यसको तत्काल कार्यान्वयन गर्न आग्रह गरेको छ ।
केन्द्रीय बैंकले कोभिड महामारीबाट निजी क्षेत्रको पुनरुत्थानमा निक्कै सहयोगी नीति अबलम्बन गरेको भन्दै महासंघले अल्पकालिन उपाय नहेरि तरलता अभावका कारण समस्याग्रस्त निजी क्षेत्रको हितका लागि समिक्षामा लिइएका नीतिको पुनरावलोकन गरि व्यापार/ व्यवसाय सञ्चालन एवं विस्तारको वातावरण बनाउन आग्रह पनि गरेको छ ।
