पुस १२, काठमाडौं। नेपाल लाइफ इन्स्योरेन्स कम्पनीले ५ महीनामा करीब ३ अर्ब रुपैयाँ प्रथम बीमा शुल्क आर्जन गरेको छ।
कम्पनीले चालू आर्थिक वर्षको पहिलो पाँच महीना अर्थात् मंसिर अन्त्यसम्मको अवधिमा २ अर्ब ९८ करोड रुपैयाँ प्रथम बीमाशुल्क आर्जन गरेको छ ।कम्पनीले मंसिर महीनामा सबैभन्दा धेरै बीमा शुल्क आर्जन गरेको पनि दावी गरेको छ।
कम्पनीले जीवन बीमाको क्षेत्रमा देशकै नं १ कम्पनी भएको पनि दावी गरेको छ। कम्पनीले गत पुस ६ गतेदेखि ‘नेपालकै नम्बर १’ अभियान सञ्चालन गरिरहेको छ।
जीवन बीमाको विश्वसनीयता तथा जीवन बीमामा आकर्षण बढाउने उद्देश्यका साथ कम्पनीले पुस ६ गतेदेखि ‘नेपालकै नम्बर १’ अभियान सार्वजनिक गरेको कम्पनीका कार्यवाहक प्रमुख कार्यकारी अधिकृत सुशिलकुमार चौधरीले बताए।
आर्थिक वर्ष २०७८/७९ को पहिलो त्रैमासमा कम्पनीसँग १ खर्ब १८ अर्ब ७६ करोड रुपैयाँको सर्वाधिक जीवन बीमा कोष, २९ लाख ८३ हजार १६ सर्वाधिक बीमा लेख जारी, ४० अर्ब ५० करोड रुपैयाँ सर्वाधिक दावी भुक्तानी र ७ अर्ब १९ करोड रुपैयाँ सर्वाधिक चुक्तापूँजी रहेको छ।
कम्पनीले पत्रपत्रिका, आफ्ना सामाजिक सञ्जाललगायत सञ्चार माध्याममार्फत ‘नेपालकै नम्बर १’ अभियान सार्वजनिक गरी तथ्य परक प्रमाणहरु प्रस्तुतगर्दै अभियान नै सञ्चालन गरिरहेको छ ।
कम्पनीले उक्त अभियानले समेत बजारमा सकारात्मक प्रभाव पारेको दावी गरेको छ । अधिकांश सूचकले नेपाल लाइफ जीवन बीमा क्षेत्रमा अब्बल सावित भएको कम्पनीले दाबी गरेको छ ।
.jpeg)
