पुस १८, काठमाडौं । सशस्त्र प्रहरी जवान पदको खुल्ला प्रतियोगिताको लिखित परीक्षामा अर्काको नाममा परीक्षा दिंदै गरेका दुई जना नक्कली परीक्षार्थी शनिवार पक्राउ परेका छन् ।
पक्राउ पर्नेहरुमा बाग्लुङ जिल्लाको ढोरपाटन नगरपालिका - ६ बस्ने १८ वर्षिय निल कुमार अदै र धनकुटा जिल्लाको सहिदभूमी गाउँपालिका - ५ बस्ने २७ वर्षिय सौहार्द राई छन् ।
सशस्त्र प्रहरी बल, नेपाल नम्वर ४ मुक्तिनाथ बाहिनी पोखराबाट दरखास्त फाराम बुझाएका दर्ता नम्वर ३१ हजार ७१५ का सुनिल पुन मगरको स्थानमा अदै र सशस्त्र प्रहरी बल नेपाल नम्वर१ बाहिनी पकलीबाट दरखास्त फाराम बुझाएका दर्ता नम्वर १४ हजार ४२० का योगेन्द्र राईको स्थानमा नक्कली उम्मेदवार बनी परीक्षा दिन खोज्ने सौहार्द राई पक्राउ परेका हुन् ।
हालै प्रकाशित विज्ञापन अनुसार खुल्ला प्रतियोगितद्वारा पदपूर्ती गरिने साधारण समूह साधारण उपसमूहतर्फ सशस्त्र प्रहरी जवान पदकोे लिखित परीक्षामा सशस्त्र प्रहरी बलको तर्फबाट ‘थम्ब रिडर बायोमेटिक डिभाईस’ प्रयोग गरी परीक्षार्थीहरुको एकिन गर्ने क्रममा नक्कली परीक्षार्थी प्रमाणित भएको हो ।
पक्राउ परेका दुवै जनालाई आवश्यक कारवाहीको लागि प्रहरीलाई बुझाइएको सशस्त्र प्रहरी बल प्रधान कार्यालयका सशस्त्र प्रहरी निरीक्षक शैलेन्द्र थापाले जानकारी दिएका छन् ।
