जेठ २, रुपन्देही । भैरहवास्थित गौतमबुद्ध अन्तरराष्ट्रिय विमानस्थलबाट अन्तरराष्ट्रिय उडान शुरु भएको छ ।
सोमवार बिहान ७ बजे पहिलोपटक अन्तरराष्ट्रिय जजिरा एयरलाइन्सको जहाज विमानस्थलमा अवतरण गरेको हो । २५ सय ६६औं बुद्धजयन्तीको अवसर पारेर कुवेतबाट १७८ यात्रु बोकेर न्यारोबडी जहाजले उडान गरेको हो ।
जहाजलाई विमानस्थलमा पानीका फोहोरासहित स्वागत गरिएको थियो । गौतमबुद्ध अन्तरराष्ट्रिय विमानस्थलको सोमवार बिहान प्रधानमन्त्री शेरबहादुर देउवाले उद्घाटन गर्नुभएको छ ।
जजिराले मंगलवार बिहान २ः३० बजेको समयमा नेपालबाट यात्रु बोकी कुवेतका लागि उडान गर्ने योजना रहेको नेपाल नागरिक उड्डयन प्राधिकरणले बताएको छ ।
उद्योग वाणिज्य संघ सिद्धार्थनगरको पर्यटन विभाग प्रमुख सञ्जय बजिमयका अनुसार साताको तीन दिन (सोमवार, बुधवार र शुक्रवार) नियमित उडान गर्ने गरी प्रक्रिया अगाडि बढेको छ । आफ्नो ट्राभलले भैरहवाबाट जाने ३० यात्रुको बुकिङ गरिसकेको उनले बताए। पुरानो विमानस्थलमा अहिले दैनिक २४ जहाजले आन्तरिक उडान गर्छन् ।
एउटा मात्र रनवेले कारण ट्राफिक चाप हुने गरेकाले चाप व्यवस्थापन गर्न अन्तराष्ट्रिय विमानको उडानलाई रातिको समयमा राखिएको उक्त अन्तरराष्ट्रिय विमानस्थलका महाप्रबन्धक गोविन्द दाहालले बताए । रासस