पुस १६, काठमाडौं। नेपाल चेम्बर अफ कमर्सको ७० औं वार्षिक उत्सवको अवसरमा प्रकाशित हुलाक टिकटको प्रथम दिवश मनाईएको छ।
५ रुपैयाँ दरको हुलाक टिकटको प्रथम दिवशमा सञ्चार तथा सूचना प्रविधि मन्त्री ज्ञानेन्द्र वहादुर कार्कीले प्रथम दिवशीय टांचा प्रदान गरेको चेम्बरले बताएको छ। कार्यक्रममा बोल्दै मन्त्री कार्कीले प्रजातन्त्र स्थपना भएको पनि ७ दशकनै पुगेको भन्दै सबै एक जुट भएर लाग्यौ भने आर्थिक समृद्धि हाशिल गर्न धेरै समय नलाग्ने बताए।
चेम्बर भवनमा आयोजित उक्त कार्यक्रममा नेपाल चेम्बर अफ कमर्सका अध्यक्ष राजेन्द्र मल्लले चेम्वरले बिगत ७० वर्षदेखि मुलुकको आर्थिक क्षेत्रमा प्रदान गरेको योगदानलाई कदर गर्दै संस्मरणात्मक हुलाक टिकट प्रकाशन गरी दिएकोमा सञ्चार तथा सूचना प्रविधि मन्त्रालयप्रति आभार व्यक्त गरे।
नेपाल चेम्बर अफ कमर्स ‘चेम्बर अभियान’ लाई विस्तार गर्न र व्यावसायिक क्षेत्रको सशक्तीकरणकालागि प्रतिबद्ध रहेको भन्दै निजी र सरकारी क्षेत्र बीच समन्वयकारी भूमिका निर्वाहमा चेम्बरको अहम भूमिका रहेको मल्लले बताए।
शुक्रवार प्रकाशित हुलाक टिकटले नेपाल चेम्बर अफ कमर्सको पहिचान सहित चेम्वर अभियानलाई बिश्वव्यापी बनाउन मद्धत पुग्ने उक्त मन्त्रालयका सचिव वैकुण्ठ अर्यालले बताए।
