जेठ ९, काठमाडौं । साताको पहिलो कारोबार दिन सोमवार नेप्से परिसूचक ३४ दशमलव २१ अंक घटेको छ । परिसूचक २ हजार २०० दशमलव ८८ विन्दुमा झरेको हो ।
यस अवधिमा कारोबारमा आएका २२४ ओटा धितोपत्रको ३९ लाख १७ हजार ६५५ कित्ता शेयर २८ हजार ५०६ पटकमा रू. १ अर्ब ३६ करोड ९५ लाख १३ हजार १९१ दशमलव ५० बराबरको शेयर खरीदविक्री भएको छ ।
नेप्से परिसूचक दिनहुँ घट्दो क्रममा रहेको छ । शुक्रवार पनि परिसूचक १५ दशलमव ८२ अंक घटेको थियो । सोमवार नेप्से परिसूचक २ हजार २०० विन्दुको मनोवैज्ञानिक विन्दुमा आएको छ । यस भन्दा अगाडि पनि २ हजार २०० को वरिपरिबाट बजार फर्किएको थियो । पुनः दोस्रो पटक सोही विन्दुमा आएको छ ।
पछिल्लो समय वित्तीय प्रणालीमा तरलता अभाव लगायत नीतिगत सु्धार हुन नसक्दा नराम्रोसँग प्रभावित भएको छ । विशेषगरी शेयरधितो कर्जामा ४-१२ करोडको सीमा लागू र बैंकलाई अल्पकालिन रुपमा शेयर कारोबारमा बन्देज लगाएसँगै बजार प्रभावित भएको हो ।
अब मौद्रिक नितिको तेस्रो त्रैमासिक समीक्षा र बजेट सार्वजनिक हुने दिन नजिकिएका छन् । यसले गर्दा केही नीतिगत सुधार भएमा पूँजी बजारमा सकारात्मक प्रभाव पर्ने देखिन्छ । यद्धपि शेयर बजार घटबढ हुने गर्दछ । लगानीकर्ताले लगानी गर्नुपूर्व कम्पनीको आधारभूत पक्ष र प्राविधिक पक्ष राम्रो सँग केलाएर लगानी गरेमा राम्रो प्रतिफल हुने देखिन्छ ।
कारोबारमा आएका २२४ ओटा धितोपत्रमध्ये सबैभन्दा बढी गुँरास लघुवित्त वित्तीय संस्थाको शेयरमूल्य ६ दशमलव २० प्रतिशत वृद्धि भएको हो । कम्पनीको शेयरमूल्य प्रतिकित्ता रू. १ हजार १३७ दशमलव ५० पुगेको छ । त्यसैगरी दोस्रोमा प्रभु लाइफ इन्स्योरेन्स कम्पनीको शेयरमूल्य ५ दशमलव २६ प्रतिशत वृद्धि भएर रू. ४४२ दशमलव १० पुगेको छ ।
सोमवार सबैभन्दा बढी मिथिला लघुवित्त वित्तीय संस्थाको शेयरधनीले गुमाएका छन् । यस कम्पनीको शेयरमूल्य अघिल्लो कारोबार दिनको तुलनामा ५ दशमलव ८९ प्रतिशत घटेसँगै धेरै गुमाएका हुन् । कम्पनीको शेयरमूल्य प्रतिकित्ता रू. १ हजार ३४० मा झरेको हो । त्यसैगरी दोस्रोमा विन नेपाल लघुवित्त वित्तीय संस्थाको शेयरमूल्य ५ दशमलव ८७ प्रतिशत घटेर रू. १ हजार १२३ कायम भएको हो ।
सर्वाधिक शेयर खरीदविक्री नबिल बैंकको भएको छ । कम्पनीको रू. ४ करोड १५ लाख बराबरको शेयर खरीद विक्री भएको हो । शेयरमूल्य प्रतिकित्ता रू. ८९९ कायम भएको हो । त्यसैगरी सर्वाधिक शेयर खरीदविक्री हुने दोस्रो कम्पनीमा अरुण भ्याली हाइड्रोपावर कम्पनीको रू. ३ करोड ८७ लाख बराबरको भएको छ ।
कारोबारमा आएका १३ ओटै समूहगत परिसूचक घटेसँगै समग्र नेप्से परिसूचक घटेको हो । समूहगत परिसूचक घट्नेमा सबैभन्दा बढी जीवन बीमा समुहको परिसूचक २ दशलमव ६२ प्रतिशत घटेको छ ।
त्यसैगरी, बैंकिङ समूहको १ दशमलव १६ प्रतिशत, विकास बैंक समूहको १ दशलमव ९७ प्रतिशत, वित्त समूहको २ दशमलव शून्य ४ प्रतिशत, होटल एण्ड टुरिजम समूहको २ दशमलव ४४ प्रतिशत, हाइड्रोपावर समूहको २ दशमलव शून्य ८ प्रतिशत, लगानी समूहको २ दशमलव शून्य १ प्रतिशत, उत्पादन तथा प्रशोधन समूहको १ दशमलव ३५ प्रतिशत, लघुवित्त समूहको १ दशमलव ८४ प्रतिशत, म्युचुअल फण्ड समूहको शून्य दशलमव ९२ प्रतिशत, निर्जीवन बीमा समूहको १ दशमलव ७२ प्रतिशत, अन्य समूहको शून्य दशमलव २४ प्रतिशत र व्यापार समूहको समूहगत परिसूचक १ दशमलव १३ प्रतिशतका दरले घटेको हो ।
