काठमाडौं । नेपाल बीमा प्राधिकरणले आइएमई जनरल इन्स्योरेन्स र प्रुडेन्सियल इन्स्योरेन्सलाई एकीकृत कारोबारका लागि स्वीकृति प्रदान गरेको छ । गत माघ २७ गते मर्जरका लागि प्रारम्भिक सम्झौता गरेका यी दुई कम्पनीलाई एकीकृत कारोबार शुरू गर्न प्राधिकरणले आइतवार स्वीकृति प्रदान गरेको हो ।
आगामी वैशाखको अन्तिम सातादेखि एकीकृत कारोबार शुरू गर्ने योजनामा रहेको कम्पनीहरूले अब कम्पनी रजिष्ट्रारको कार्यालय र नेपाल धितोपत्र बोर्डबाट पनि स्वीकृति लिनुपर्नेछ । नियामक निकायबाट स्वीकृति पाएको एक महीनाभित्र एकीकृत कारोबार गरिसक्नुपर्ने व्यवस्था बमोजिम कम्पनीहरूले आगामी वैशाख २७ गतेदेखि एकीकृत कारोबार गर्ने तयारी गरेका हुन् ।
नयाँ निर्जीवन बीमा कम्पनीको रूपमा सञ्चालित आइएमई जनरल इन्स्योरेन्सको चुक्तापूँजी रू. १ अर्ब ८० करोड ३७ लाख ५० हजार रहेको छ । आइएमई जनरल इन्स्योरेन्सले गत वर्षको मुनाफाबाट यस वर्ष ६ प्रतिशत बोनस शेयर वितरण गरी पूँजी बढाएको हो ।
त्यसैगरी प्रुडेन्सियल इन्स्योरेन्सको चुक्तापूँजी रू. १ अर्ब १८ करोड ६१ लाख ४४ हजार रहेको छ । प्रुडेन्सियल इन्स्योरेन्सले हाल कायम चुक्तापूँजीको आधारमा ३ दशमलव ३२ प्रतिशत बोनस शेयर वितरण गर्ने प्रस्ताव चैत १६ गते सम्पन्न वार्षिक साधारण सभाबाट पारित गरेको छ ।
बोनसपछि प्रुडेन्सियलको चुक्तापूँजी रू. १ अर्ब २२ करोड ५५ लाख ८३ हजार पुगेको छ । यी दुई कम्पनी समान हैसियतमा मर्जरमा जान लागेका हुन् । एकीकृत कारोबारपछि बन्ने आइजीआई प्रुडेन्सियल इन्स्योरेन्स लिमिटेडको चुक्तापूँजी रू. ३ अर्ब २ करोड ९३ लाख ३३ हजार पुग्नेछ ।
