काठमाडौं (अस) । नेपाल स्वास्थ्य व्यवसायी महासंघको अध्यक्षमा कैलाश खड्का सर्वसम्मत चयन भएका छन् । उनी तेस्रो कार्यकालका लागि चयन भएका हुन् । आइतवार काठमाडौंमा सम्पन्न महासंघको साधारणसभाले खड्कालाई आगामी ३ वर्षका लागि अध्यक्षमा चयन गरेको हो ।
सभाले महासंघको वरिष्ठ उपाध्यक्षमा महेशराज श्रेष्ठ, प्रथम उपाध्यक्षमा गायत्री जिसी र द्वितीय उपाध्यक्षमा धनबहादुर गिरीलाई चयन गरेको छ । त्यस्तै महासचिवमा दाताराम काफ्ले, सचिवमा लीलाम्बर झा र कोषाध्यक्षमा रामपुकार तिवारी चयन भएका छन् । चन्द्रमा राई, प्रवेश रोका क्षेत्री, दीपक कार्की, पप्पु महासेठ, बेलबहादुर श्रेष्ठ, केशर थापा र रोजिना शाक्य सदस्यमा चयन भएका छन् ।
महासंघले रोजगारीका लागि मलेशिया जाने कामदारको बायोमेट्रिक प्रणालीबाट स्वास्थ्य परीक्षण गर्दै आएको छ । रोजगारीका लागि सबभन्दा ठूलो गन्तव्य (हालसम्म श्रम स्वीकृति लिएको संख्याको आधारमा) मलेशिया जान बायोमेट्रिक प्रणाली अनिवार्य गरिएपछि यसका लागि नेपाल र मलेशिया सरकारले महासंघलाई छनोट गरेको हो ।
वैदेशिक रोजगार विभागका अनुसार रोजगारीका लागि मलेशिया जान हालसम्म करीब १० लाखले श्रम स्वीकृति लिएका छन् । तीमध्ये करीब २ लाख मलेशियामै रहेको बताइन्छ । कोरोना महामारीका कारण २ वर्ष बन्द रहेको मलेशियाको रोजगारी केही समयअघि सुचारु भएको छ ।