एशियाली विकास बैंकको प्रक्षेपणअनुसार चालू आर्थिक वर्षमा नेपालको अर्थिक वृद्धिदर ४ दशमलव ५ प्रतिशत हुनेछ । अघिल्लो वर्षको तुलनामा यो वृद्धिदर १ प्रतिशत बढी हो । यद्यपि, यो वृद्धिदर स्थिर हुन सक्ने देखिएको छैन । कृषि तथा सेवाक्षेत्रको वृद्धिका कारण मात्र मुलुकको आर्थिक वृद्धिदर बढेकाले सन् २०१३ मा पुन: ४ प्रतिशतमा ओर्लने एडीबीको प्रक्षेपण छ । त्यसैले यो आर्थिक वृद्धिदरलाई स्थिर बनाएर बढाउँदे लैजाने हो भने उत्पादनमूलक उद्योग–व्यवसाय स्थापनामा विशेष जोड दिनुपर्छ । मौसममा आधारित अधिकतम कृषिकर्म हुने हाम्रोजस्तो मुलुकमा कृषिको वृद्धिदर दिगो रहन सक्दैन । यो वर्ष मौसम राम्रो भएर कृषिक्षेत्रको उत्पादन राम्रो भयो । त्यस्तै सेवाक्षेत्रको वृद्धि पनि स्थिर रहँदैन । यस वर्ष डलरको मूल्य बढी र नेपाली रुपैयाँ कमजोर भएकाले रेमिट्यान्स बढी भित्रिएको देखिएको छ । यही रेमिट्यान्सले सेवा व्यापार बढाएको हो । तर, रेमिट्यान्स घट्नेबित्तिकै सेवा क्षेत्रको वृद्धि पनि स्वाभाविक रूपले घट्छ । त्यसैले कृषि र सेवाक्षेत्रको वृद्धिले बढेको यो आर्थिक वृद्धिदरप्रति मख्ख पर्नुको कुनै औचित्य छैन ।
(सम्पादकीयबाट)
वर्ष ६, अंक २१०, शुक्रवार, १ वैशाख, २०६९
