असार २१, ताप्लेजुङ । ताप्लेजुङ जिल्लाको सुकेटार विमास्थलमा नेपाल वायु सेवा निगमले आज (सोमवार) देखि नियमित उडान शुरु गरेको छ । कोभिड-१९ महामारीका कारणले नियमित उडान दुई महीना बन्द भएको थियो ।
सोमवार काठमाडौंबाट ९ जना यात्रु लिएर आएको विमान मौसम खराबीका कारण अवतरण हुन नसकेको सुकेटार विमानस्थलका स्टेशन इन्चार्ज लोकेन्द्र लिम्बूले बताए । १२ मिनेटभन्दा बढी अवतरणको प्रयास गर्दा पनि मौसमका कारणले अवतरण हुन नसकेर काठमाडौंमै फर्किएको जानकारी दिइएको छ ।
ताप्लेजुङबाट १२ जना यात्रु काठमाडौं जानका लागि बुकिङ गरेर सुकेटार विमानस्थलसम्म पुगेका थिए । मौसमका कारणले विमान अवतरण हुन नसक्दा पूर्न फुङ्लिङ फर्कीएको लिम्बूले बताए । सुकेटारमा हप्तामा चार दिन (सोमवार, बुधवार, शुक्रवार र शनिवार) नियमित उडान हुने सुकेटार विमानस्थल कार्यालयले जानकारी दिएको छ ।
तत्कालका लागि काठमाडौंदेखि ताप्लेजुङसम्म रू. सात हजार ५० र ताप्लेजुङदेखि काठमाडौं रू. सात हजार १९० भाडा शुल्क तोकिएको सुकेटार विमानस्थल कार्यालयले जानकारी दिएको छ । निगमले ताप्लेजुङदेखि विराटनगरमा पनि नियमित उडानका लागि प्रक्रिया अगाडि बढाइरहेको बताइएको छ । रासस
