डेढ करोड बराबरको भन्सार छलीको मदिरासहित ४ पक्राउ

क्रिप्टो, हाइपर फण्डबारे विस्तृत अनुसन्धान थालिने

काठमाडौं । क्रिप्टो, हाइपर फण्ड र अनलाइन नेटवर्किङ नियन्त्रण गर्न गठित उच्चस्तरीय कार्यदलले पीडितको उजुरीलाई आधार मानेर विस्तृत अनुसन्धान थाल्ने भएको छ । अर्थ मन्त्रालयमा सहसचिव भूपाल बरालको नेतृत्वमा मंगलवार बसेको बैठकले पीडितहरूले प्रहरीमा गरेको उजुरीलाई आधार मान्दै थप अनुसन्धान थाल्ने निर्णय गरेको हो । राजस्व अनुसन्धान विभागले ३७ करोड बिगोसहित रूपमा कैलालीका दिनेश खड्काविरुद्ध अदालतमा मुद्दा दायर गरेपछि क्रिप्टो कारोबारको विषय बाहिर आएको थियो । महानगरीय अपराध महाशाखाको टोलीले माघ ६ गते क्रिप्टो करेन्सी गरेको अभियोगमा तीनजनालाई नियन्त्रणमा लिएको थियो । प्रहरीले राजन भट्टराई, विशाल श्रेष्ठ र दीपेशराज श्रेष्ठलाई पक्राउ गरेको थियो । त्यस्तै माघ १८ गते महानगरीय प्रहरी कार्यालय रानीपोखरीको टोलीले न्यूरोडबाट ३० वर्षीय रवीन्द्र अधिकारी भनिने चन्द्रमणि अधिकारीलाई नियन्त्रणमा लिएको थियो । अधिकारीले प्रयोग गर्ने मोबाइलमा डेढ करोड रुपैयाँ बराबरको क्रिप्टोको कारोबार भएको खुलेको थियो । त्यस्तै, पुस १ गते त्रिभुवन अन्तरराष्ट्रिय विमानस्थलको भन्सार कार्यालयले क्रिप्टोमा प्रयोग हुने ३० ओटा डिभाइस समेत बरामद गरेको थियो । अहिलेसम्म यो डिभाइस कसले मगायो भन्ने खुलेको छैन । यिनै घटनाक्रमले नेपालभित्र क्रिप्टो लगायत भच्र्युअल मुद्राको कारोबार व्यापक रूपमा चलिरहेको आकलनमा कार्यदल गठन गरिएको थियो । समितिको बैठकले क्रिप्टो, हाइपर फण्डलगायतका विषयमा देशभित्र भएका गतिविधिबारे छलफल गरेको र क्रिप्टोको अवस्था, प्रयोगकर्ता, अर्थतन्त्रमा परेको असरबारे सम्बन्धित निकायलाई जानकारी लिन समेत आग्रह गरेको छ । नेपाल राष्ट्र बैंकले पनि यस्ता कुनै पनि कारोबार नगर्न सर्वसाधारणलाई आग्रह गरिसकेको छ । यस्तो गतिविधि गरेको पुष्टि भएमा नेपाल राष्ट्र बैंक ऐन, २०५८ को दफा ९६ अनुसार दण्ड सजाय हुने समेत केन्द्रीय बैंकले बताएको छ ।