एमसीसी प्रकरणमा आफ्नो आधिकारिक धारणा सार्वजनिक गर्न प्रमुख प्रतिपक्षी दल नेकपा एमालेले आज पत्रकार सम्मेलनको आयोजना गरेको छ । एमाले केन्द्रीय प्रचार विभागका उपप्रमुख विष्णु रिजालका अनुसार आज दिउँसो १ बजे तीनकुने स्थित रोयल ब्यांकेटमा पत्रकार सम्मलेनको आयोजना गरिएको हो ।एमसीसी प्रकरण लगायत मुलुकको विकसित परिस्थितिका बारेमा नेकपा (एमाले)का आधिकारिक धारणाहरू सार्वजनिक गर्न अध्यक्ष केपी शर्मा ओलीको उपस्थितिमा पत्रकार सम्मेलन आयोजना गरिएको नेता रिजालले जानकारी दिएका छन् ।आइतबार बसेको प्रतिनिधिसभाको बैठकले बहुमतको आधारमा एमसीसी पारित गरेको थियो । नेकपा एमालेले पनि आफ्नो पुरानो अडान दोहोर्याउदै कुनै पनि संसदीय प्रक्रियामा भाग लिएको थिएन । एमालेले संसदमा बेल घेराउ गर्दै ‘हाम्रो विरोध जारी छ’, ‘संवैधानिक सर्वोच्चता कायम गर’, ‘गैरसांसदलाई प्रवेश निषेध गर’,‘पार्टी फुटाउने षड्यन्त्र मुर्दावाद’ लगायतका नारा लगाउदै आएको छ । आफ्नामाग पुरा नभएसम्म संसदको अवरोध नखोल्ने एमालेको अडान छ । एमालेले आफ्ना पार्टीले कारवाही १४ जना सांसदलाई कारवाही गरेकोमा सो को सूचना सभामुखले टाँस गर्नु पर्ने वा सभामुखले राजिनामा दिनु पर्ने माग अगाडी सारेको छ । माधव नेपाल नेतृत्वको नेकपा एसका सांसदहरुलाई एमालेले गैर सांसद भन्दै उनीहरुको उपस्थितिमा संसद चल्न नसक्ने बताउदै आएको छ । एमाले फुटाएर माधव नेपालले नेकपा एस गठन गरेका थिए ।