प्रष्ट नीति बनाउन सुनचाँदी व्यवसायीको माग, 'सुनचाँदी व्यवसाय निर्देशिका बनाए पालना गर्छौं´

फागुन २५, काठमाडौं । सुनचाँदी व्यवसायी महासंघले प्रष्ट नीति बनाउन सरकारसँग माग गरेको छ । महासंघका पदाधिकारीले बुधवार वाणिज्य आपूर्ति तथा उपभोक्ता संरक्षण विभागका महानिर्देशकसँग भेट गर्दै उक्त माग गरेका हुन्। महासंघका अध्यक्ष माणिक रत्न शाक्यको नेतृत्वमा विभागमा पुगेको प्रतिनिधिमण्डलले सुनको कारोबारका लागि स्पष्ट नीति नभएकोले स्पष्ट नीति बनाउन महानिर्देशकसँग माग गरेको हो। सुनचाँदी ब्यवसायको कारोबारका लागि हालसम्म पनि प्रष्ट नीति बन्न नसक्दा ब्यवसाय सञ्चालनमा बाधा पुगेकोले महासंघका अध्यक्ष शाक्यले सरकारले सुनचाँदी कारोबारको निर्देशिका बनाइदिएमा सोही अनुसार कारोबार गर्न सजिलो हुने बताए। ‘सरकारले सुनचाँदी व्यवसाय निर्देशिका बनाएमा त्यसलाई अक्षरस पालनागरी अगाडि बढ्न ब्यवसायीहरु तयार छन्’ शाक्यले भने, ‘आफुहरुले वर्षौंदेखि यस बिषयमा आवाज उठाउँदै आएको भएपनि हालसम्म त्यसको संबोधन हुन सकेको छैन।’ व्यवसायीसँगको भेटका क्रममा विभागका महानिर्देशक प्रेमकुमार श्रेष्ठले कुनै पनि पेशा ब्यवसाय सञ्चालनका लागि प्रष्ट नीति नियम आवश्यक पर्ने भन्दै सुनचाँदी व्यवसाय, व्यवसायी र उपभोक्ता सरोकारलाई समेट्ने गरी नीति बनाउन पहल गरिने बताए। नीति निर्माणका लागि अन्य सरकारी निकायसँग पनि समन्वय गुर्नपर्ने भन्दै सोही अनुसार अगाडी बढ्ने श्रेष्ठको भनाई थियो। सअघि व्यवसायीले आफुहरुले भोगदै आएका समस्याका बारेमा महानिर्देशक श्रेष्ठलाई सुनाएका थिए।  प्रष्ट नीतिको अभावमा मुनाफा, ज्यालाजर्ती, टोलसेन्स जस्ता बिषयमा अष्प्रष्टता देखिएको व्यवसायीहरुको भनाई छ । जसकाकारण व्यवसायीहरु अप्ठ्यारोमा पर्ने गरेको गुनासो गर्दै आएका छन् । विभागमा पुगेको प्रतिनिधिमण्डलमा महासंघका  निवर्तमान अध्यक्ष मोहन सुनार, वरिष्ठ उपाध्यक्ष अर्जुन रसाइली, प्रथम उपाध्यक्ष मोहनकाजी शाक्य, महासचिव धर्मशुन्दर बज्राचार्य, कोषाध्यक्ष सुदिप श्रेष्ठ, मधेश प्रदेश सभापति रामजी साह लगायतका व्यवसायीको सहभागिता रहेको थियो ।