काठमाडौं (अस) । नबिल इन्भेष्टमेण्ट बैंकिङ लिमिटेडले मुलुकका सातै प्रदेशमा सचेतनामूलक कार्यक्रम गर्ने भएको छ । कम्पनीले यसअघि सुदूरपश्चिम प्रदेश र गण्डकी प्रदेशमा गरिसकेको सचेतनामूलक कार्यक्रम सातै प्रदेशमा गर्ने भएको हो । कम्पनीले संस्थागत सामाजिक उत्तरदायित्व अन्तर्गत शेयर बजार सम्बन्धी गर्दै आएको सचेतनामूलक कार्यक्रम मुलुकका सबै प्रदेशमा गर्ने जानकारी दिएको हो । सचेतना कार्यक्रममा शेयर बजारमा कसरी प्रवेश गर्ने तरीका, धितोपत्र सम्बन्धी ऐन नियम तथा निर्देशन लगायतका बारेमा जानकारी दिइनेछ । त्यस्तै कार्यक्रममार्फत धितोपत्र व्यवसायी तथा मर्चेन्ट बैंकरहरूको काम, कर्तव्य र अधिकारका बारेमा समेत जानकारी दिइने बताइएको छ ।
यसअघि गत फागुन २२ मा उक्त कार्यक्रम सुदूरपश्चिम प्रदेशको धनगढीमा गरिएको थियो । त्यस्तै गण्डकी प्रदेशमा समेत सो कार्यक्रम सम्पन्न भइसकेको कम्पनीको भनाइ छ । ती कार्यक्रममा कम्पनीका इन्भेष्टमेन्ट बैंकिङ विभाग प्रमुख विकासचन्द्र भण्डारीले विद्यमान नेपालको धितोपत्र बजारबाट लिन सकिने फाइदा र मर्चेन्ट बैंकरहरूले प्रदान गर्ने सेवाहरूको बारेमा जानकारी गराएका थिए ।