असार १५, काठमाडौं । साताको तेस्रो कारोबार दिन मंगलवार बजार ४७ दशमलव ५० अंकले बजार घट्दा पाँच ओटा कम्पनीको शेयरमूल्यमा उच्च गिरावट आएको छ ।
ती पाँच ओटा कम्पनीमध्ये सबैभन्दा बढी प्रोग्रेसिभ फाइनान्सको शेयरमूल्य अघिल्लो कारोबार दिनको तुलनामा ८ दशमलव ५५ प्रतिशतले घटेको छ । यो दिन उक्त कम्पनीको शेयरमूल्य प्रतिकित्ता रू. ३१० मा झरेको हो ।
त्यसैगरी हाइड्रो इलेक्ट्रिसिटीको इन्भेष्टमेण्ट एण्ड डेभलपमेण्ट कम्पनीको शेयर मूल्य अघिल्लो कारोबार दिनको तुलनामा ८ दशमलव शून्य ७ प्रतिशत,वेष्ट फाइनान्सको ८ दशमलव शून्य १ प्रतिशत,श्री इन्भेष्टमेण्ट एण्ड फाइनान्सको ७ दशमलव १८ प्रतिशत र सेन्ट्रल फाइनान्सको शेयरमूल्य ६ दशमलव ९० प्रतिशतका दरले घटेको हो ।
ती पाँच ओटै कम्पनीको शेयरमा खरीदकर्ताभन्दा विक्रेता धेरै भएकाले शेयरमूल्य घटेको हो । यो दिन हाइड्रो इलेक्ट्रीसिटीको शेयरमूल्य प्रतिकित्ता रू.४६७,वेष्ट फाइनान्सको रू.३३३,श्री इन्भेष्ट मेण्ट एण्ड फाइनान्सको रू.३७५ र सेन्ट्रल फाइनान्सको रू. ३५१ कायम भएको छ ।
पछिल्लो समय बजार घट्न थालेसँगै लगानीकर्ताले आत्तिएर शेयर विक्री गरेको पाइएको छ । यसअघि ३ हजार विन्दु पार गरेको बजार अहिले आएर २ हजार ८२८ विन्दुमा आइपुगेको छ ।
यसले गर्दा कतिपय लगानीकर्ता पर्ख र हेरको अवस्था रहेका छन् । कतिपय लगानीकर्ता बजार अझ तल आउने होकी भनेर पर्खेर पनि बसेको देखिएको छ । सोही कारण दैनिक रू. १८ ÷२० अर्ब रुपियाँको हाराहारीमा भइरहेको कारोबार एक साता यता रू. ५ देखि ७ अर्बमा भइरहेको छ ।
