काठमाडौँ । नेकपा (मसाल) ले २३ दलीय कार्यगत एकता कायमै रहनेमा आशावादी रहेको बताएको छ ।
आजै नेकपा (क्रान्तिकारी–माओवादी) सहितका चार दलको माझमा “रणनीतिक” संयुक्त मोर्चा गठन गर्ने सहमति भएको सन्दर्भमा पार्टीको यस्तो अवधारणा अगाडि आएको हो ।
महामन्त्री मोहनविक्रम सिंहको हस्ताक्षरमा २०७७ पुस १४ गते प्रकाशित प्रेसवक्तव्यमा पार्टीले यस्तो अवधारणा व्यक्त गरेको छ ।
२३ राजनीतिक दल तथा सङ्घसंस्थामध्येकै चार दलहरू “नेकपा (क्रान्तिकारी–माओवादी), नेकपा (विप्लव), नेकपा (ऋषि कट्टेल), वैज्ञानिक समाजवादी कम्युनिस्ट पार्टी, नेपालका बिचमा “रणनीतिक” संयुक्त मोर्चा कायम भए पनि सहमतिको आधारमा अहिलेको कार्यगत एकता कायमै राख्न प्रयत्न गर्ने मसालले जनाएको छ ।
प्रेसवक्तव्यको पूर्ण पाठ यस्तो छ–
“नेकपा (क्रान्तिकारी–माओवादी), नेकपा (विप्लव), नेकपा (ऋषि कट्टेल), वैज्ञानिक समाजवादी कम्युनिस्ट पार्टी, नेपालका बिचमा रणनीतिक संयुक्त मोर्चा बनाएको समाचारप्रति नेपाल कम्युनिस्ट पार्टी (मसाल) को ध्यान गएको छ ।
त्यस सन्दर्भमा सर्वप्रथम हामीले के कुरा प्रस्ट गर्न चाहान्छौँ भने त्यसको अर्थ २३ दलीय कार्यगत एकतामा फुट भएको होइन; र, त्यो कारणले फुट हुनुहुन्न भन्ने पनि हाम्रो निश्चित विचार छ ।
२३ दलीय बैठकमा भएका छलफलबाट देशका रणनीतिक वा कार्यनीतिक प्रश्नमा हाम्राबिचमा पहिलेदेखि नै कैयौँ मतभेद भएको कुरा स्पष्ट थियो । त्यही प्रकारले नेपाल कम्युनिस्ट पार्टी (नेकपा) र ओली सरकारबारे पनि हाम्रा बेग्लाबेग्लै सोचाइ रहेका थिए; र, अहिले पनि छन् । सङ्घर्षका रूप के हुने ? र, तात्कालिक रूपमा मुख्य जोड केमा दिने ? त्यसबारे पनि हाम्राबिचमा मतभेद रहने गरेका छन् ।
ओली सरकारद्वारा संसदको विघटनबारे पनि हाम्राबिचमा मतैक्यता कायम हुन सकेको छैन । हामीमध्ये कतिपय पक्षले संसदको विघटनलाई प्रतिगामी कदम बताउँदै त्यसको पुनस्र्थापनामा जोड दिएका छौँ भने कतिपय पक्षले त्यसलाई प्रतिगामी कदम भनेर विरोध मात्र गर्ने नीति अपनाएका छन्; र, त्यसको पुनस्र्थापनाको विचारलाई अस्वीकार गरेका छन् । कतिपय पक्षले संसदको विघटनलाई प्रतिगामी बताउन पनि अस्वीकार गरेका छन् । अन्य कतिपय प्रश्नमा पनि हाम्राबिचमा गम्भीर प्रकारका मतभेद रहेका छन् । बेग्लाबेग्लै पार्टी वा सङ्गठनका आफ्नाआफ्ना बेग्लाबेग्लै सैद्धान्तिक र राजनीतिक मान्यता ...
