माघ १२, चितवन । ट्राफिक प्रहरी कार्यालय चितवनले आर्थिक वर्ष ०७८/७९ को ६ महीनामा डेढ करोडभन्दा बढी राजस्व संकलन गरेको छ ।
कार्यालयका अनुसार चालू आवको साउनदेखि पुस मसान्तसम्ममा १ करोड ५५ लाख ७९ हजार ५०० राजस्व संकलन गरेको हो । सो अवधिमा कुल १७ हजार १०९ ओटा सवारीसाधन कारवाहीमा परेका थिए ।
कारवाही गरिएका सवारीमध्ये सबैभन्दा बढी मोटरसाइकल र सबैभन्दा कम ट्रयाक्टरबाट राजस्व संकलन भएको छ । जस अनुसार सो अवधिमा ४ हजार ७१५ मोटरसाइकल कारबाहीबाट ३९ लाख ४२ हजार ५०० रुपैयाँ र ८१२ ओटा ट्रयाक्टर कारवाहीबाट ७ लाख ५३ हजार रुपैयाँ राजस्व संकलन भएको छ ।
यसैगरी, कार्यालयले ३ हजार २३४ ओटा ट्रक, ट्रिपर कारवाहीबाट ३४ लाख ४९ हजार रुपैयाँ, २ हजार २६८ ओटा बस माइक्रो कारवाहीबाट २० लाख ७१ हजार, ३ हजार ९१४ ओटा जीप कार कारवाहीबाट ३६ लाख ९४ हजार र २ हजार १६६ ओटा टेम्पो तथा अन्य सवारी कारवाहीबाट १६ लाख ७० हजार रुपैयाँ राजस्व संकलन गरेको छ ।
कार्यालय प्रमुख प्रहरी निरीक्षक भगवानराज थापाले सवारीसाधनको कारवाही, प्रकृति र गल्ती अनुसार राजस्व संकलन हुने बताए । ‘सवारी चालकको गल्ती, प्रकृति अनुसार नै कारवाही हुन्छ, उनले भने, अर्को कुरा जुन प्रकृतिको सवारी संख्या बढी छ । लापरवाही पनि सोही सवारी साधनको भएको छ । ’
चितवनमा सबैभन्दा बढी मोटरसाइकल बढी चल्ने र दोस्रो बढी जिप, कार बढी गुड्ने र लापरवाही र गल्ती पनि उनीहरुले गरेकोले सोही अनुसार राजस्व संकलन भएको उनको भनाइ छ । चितवन भएर दैनिक २५ हजार बढी सवारीसाधन आवतजावत गर्छन् ।