बाँके । व्यावसायिक भैंसीपालन गर्दै आएका बाँकेको नरैनापुर गाउँपालिका–५ मटेहियाका बलियासार यादव गाउँपालिकाबाट कृषक पेन्सन पाउँदा दंग छन् । ‘गाउँपालिकाले हामीलाई सम्झिएर भत्ता दिएकामा धेरै खुसी लागेको छ’, ४९ भैंसी र ५ वटा गाईपालन गरी दूध बेचेर जीविकोपार्जन गर्दै आएका उनले भने, ‘अब कृषि तथा पशुपालन गर्न थप जाँगर आएको छ ।’
बाँकेको नरैनापुर गाउँपालिकाले कृषि क्षेत्रलाई प्रोत्साहन गर्न यादवसहित १२ कृषकलाई पेन्सन वितरण गरेको छ । कृषक पेन्सन कार्यक्रमअन्तर्गत चालू आर्थिक वर्षको ६ महिनामा १२ कृषक छनोट गरी जनही २ हजारका दरले कृषक पेन्सन वितरण गरिएको गाउँपालिकाका प्रमुख प्रशासकीय अधिकृत दलबहादुर बस्नेतले जानकारी दिए । उनका अनुसार गाउँपालिकामा चालू आर्थिक वर्षको साउनदेखि लागू हुने गरी प्रतिकिसान २ हजारका दरले कृषक पेन्सन कार्यक्रम सुरु भएको हो । कृषक पेन्सन कार्यक्रमका लागि पहिलो वर्ष ६ व्यावसायिक पशुपालक कृषक र ६ तरकारी खेती गर्ने किसानलाई छनोट गरी कृषक पेन्सन कार्यक्रम वितरण गरिएको छ ।
कार्यक्रमले आगामी वर्ष नरैनापुरका किसानका बीच स्पर्धा उत्पन्न भई गाउँपालिकालाई नै कृषि र पशुपालनका क्षेत्रमा आत्मनिर्भर बनाउन प्रेरित गर्न मद्दत पुर्याउने विश्वास लिएको गाउँपालिका अध्यक्ष इस्तियाक अहमद साहले बताए । ‘गाउँपालिकामा कृषि र पशुपालनको अपार सम्भावना छ’, उनले भने, ‘परम्परागत कृषि र पशुपालनमा विश्वास गर्दै आएका यहाँका किसानलाई आधुनिक कृषितर्फ आकर्षित गराउन पनि कृषक पेन्सन कार्यक्रम लागू गरिएको हो ।’
गाउँपालिकाको कृषि शाखाबाट छनोटमा पर्ने ६ जनामा सबै व्यावसायिक तरकारी खेती गर्दै आएका किसान परेका छन् । वडा–५ मा १९ कठ्ठामा व्यावसायिक तरकारी खेती गर्ने हस्मत अली साई, १४ कठ्ठामा तरकारी लगाएका हमिद मुकेरी, १२ कठ्ठामा तरकारी खेती गर्दै आएका वडा–४ दौलतपुरका धनविर थारु, १० कठ्ठामा तरकारी खेती गर्ने वडा–२ का रामसुरत मौर्य, सोही वडाकी आरती देवी मौर्य र ५ कठ्ठामा तरकारी खेती गर्दै आएकी वडा–१ की कमला तिवारीले कृषक पेन्सन प्राप्त गरेका हुन् ।
यसैगरी पशुपालक किसानबाट २ हजार कुखुरापालन गर्दै आएका वडा–६ का अमरलाल मौर्य, ५ गाई र ४९ वटा भैंसीपालन गरिरहेका वडा–५ का वलियासार यादव र वडा–२ का जहाँ इफरान अहमद कृषक पेन्सन छनोटमा परेका छन् । वडा–५ का हरिशंकर मुराउ, वडा–४ का छोटेलाल राढ र वडा–५ का रामसुमत यादवले पनि कृषक पेन्सन प्राप्त गरेका छन् । व्यावसायिक कृषि कर्म गर्ने तथा पशुपालनलाई व्यवसाय बनाउनेलाई आधार बनाएर किसान छनोट गरी कृषक पेन्सन वितरण गरिएको गाउँपालिकाका प्रमुख प्रशासकीय अधिकृत बस्नेतले बताए । रासस
