काठमाडौं । सगरमाथा लुम्बिनी इन्स्योरेन्स कम्पनी लिमिटेडको प्रमुख कार्यकारी अधिकृत (सीईओ) को जिम्मेवारी चंकी क्षेत्रीले सम्हाल्दै छन् । साविक सगरमाथा इन्स्योरेन्स र लुम्बिनी जनरल इन्स्योरेन्स मर्ज भई सगरमाथा लुम्बिनी इन्स्योरेन्सको नामबाट फागुन २९ गतेदेखि एकीकृत कारोबार शुरू गरेका छन् ।
एकीकृत कारोबार शुरू भएकै दिन फागुन २९ गतेको सञ्चालक समितिको बैठकले श्रेत्रीलाई सीईओमा नियुक्त गर्ने निणर्य गरेको थियो । उक्त निणर्यलाई नियामक निकाय नेपाल बीमा प्राधिकरणले चैत १३ गते स्वीकृति प्रदान गरेको कम्पनीले नेप्सेमार्फत जानकारी गराएको छ । बीमा क्षेत्रमा दुई दशकभन्दा बढी समयदेखि सक्रिय रहेको क्षेत्री साविक सगरमाथा इन्स्योरेन्सका सीईओ थिए ।
हाल उनी नेपाल बीमक संघको अध्यक्षसमेत रहेका छन् । साविक सगरमाथा इन्स्योरेन्सको सीईओकै आधारमा निर्जीवन बीमा कम्पनीका सीईओहरूको छाता संगठन नेपाल बीमक संघको अध्यक्षमा २०७८ साल पुस २३ गते चंकी निर्वाचित भएका थिए ।
त्यसअघि उनी नेपाल बीमक संघको महासचिव थिए । उनीसँग बीमा क्षेत्रमा दुई दशकभन्दा बढी समयको अनुभव छ । आगामी चार वर्ष चंकीले सगरमाथा लुम्बिनी इन्स्योरेन्सको व्यवस्थापनको नेतृत्व गर्नेछन् । सगरमाथा इन्स्योरेन्स र लुम्बिनी जनरल इन्स्योरेन्स १०० बराबर ८० शेयर स्वाप रेशियो कायम गर्दै मर्जरमा गएका हुन् ।
दुवै कम्पनीको बोनस शेयरपछिको स्वाप रेसियोअनुसार मर्जरपछि बनेको कम्पनीको चुक्तापूँजी रू. २ अर्ब ६२ करोडभन्दा बढी कायम भएको छ । यो कम्पनीलाई रू. ५ अर्ब चुक्तापूँजी पुर्याउनुपर्ने अवस्था छ । नेपाल बीमा प्राधिकरणले पूँजी वृद्धिका लागि यही चैत मसान्तसम्मको समयसीमा तोकेको छ ।
