काठमाडौं । सरकारले रुसमा उत्पादित कोभिड–१९विरुद्धको खोप प्रयोग र सहयोग प्राप्त गर्ने सन्दर्भमा आवश्यक कागजात उपलब्ध गराउन पत्राचार गरेको छ । विश्वभर कोभिड–१९ को संक्रमणको नयाँ भेरियन्ट फैलिरहेकै बेला सरकारले हालै रुसको खोप निर्माता सरकारी कम्पनीलाई खोपसम्बन्धी आवश्यक कागजातसहित विस्तृत जानकारी पठाउन अनुरोध गर्दै पत्राचार गरेको हो ।
रुसी प्रत्यक्ष लगानी कोषका कार्यकारी अधिकृत किरिल डिमिस्ट्रिएभलाई केही समयअघि नै त्यस सम्बन्धमा पत्रचार गरिएको सचिव डा. रोशन पोखरेलले जानकारी दिए । पत्रमा भनिएको छ, ‘कोभिड–१९ विरुद्धको खोप उपलब्ध गराउने सहायताका लागि धन्यवाद ज्ञापन गर्न चाहन्छौं । नेपालले विभिन्न कम्पनीद्वारा उत्पादित खोप लिने नीति लिएको छ । यो खोप विश्व स्वास्थ्य संगठनको मापदण्डअनुरूप हुनुपर्नेछ ।’
राष्ट्रिय खोप सल्लाहकार समिति, स्वास्थ्य सेवा विभागको सिफारिसअनुरूप खोपसम्बन्धी थप कागजात एवं दस्तावेज उपलब्ध गराउन कम्पनीलाई आग्रह गर्दै कागजात प्राप्त भएपछि समितिसमक्ष प्रस्ताव गरिने विषय पत्रमार्फत उक्त कम्पनीलाई जानकारी गराइएको छ ।
पत्रमा भनिएको छ, ‘नेपालमा हाल कोभिड–१९ नियन्त्रणमा रहेको र विश्वमा पनि संक्रमण नियन्त्रणमा होस् भन्ने नेपाल चाहना राख्छ ।’ रुसी सरकारी अनुसन्धान संस्था गामालिया नेसनल रिसर्च सेन्टर फर इपिडिमियोलोजी एन्ड माइक्रोबायोलोजीद्वारा उत्पादित खोप स्पुतनि–भी खरिद प्रक्रिया र नेपालमै उत्पादन सम्भावनाको जानकारी माग गरिएको बताइएको छ । रासस
