भदौ ३०, चितवन । यति एयरलाइन्सले आफ्नो सेवा बन्द गरेपछि गुण एयरलाईन्सले भरतपुर–काठमाडौं–भरतपुर सेवा दिने भएको छ । एयरलाइन्सले उडानको लागि अनुमति लगायत सम्पूर्ण तयारी पूरा भइसकेको जानकारी दिएको छ । दशैंलाई लक्षित गर्दै एयरलाइन्सले पहिलो पटक भरतपुरबाट सेवा दिन लागेको हो ।
एयरलाइन्सका कर्मचारी कुलराज शर्माले उडानको लागि सबै तयारी पूरा भएको जानकारी दिए । ‘हाम्रो लगभग सबै काम पूरा भएको छ र टिकट बुकिङ पनि शुरु गरेका छौं, उनले भने, असोज १ गतेबाट उडानको पक्का पक्की भइसकेको छ ।’ शुरुवाती क्षणमा एयरलाइन्सले एउटा मात्र उडानबाट सेवा शुरु गर्नेछ । हामीले शुरुमा १८ सिटे एउटा फ्लाईटबाट सेवा शुरु गर्नेछौं, शर्माले भने, यात्रुको चाप अनुसार उडान थप गर्दैछौं ।’ उनले भने ।
विमानस्थलका प्रमुख योगेन्द्र कुँवरले गुण एयरलाइन्सले उडान अनुमति लिइसकेको र फ्लाईट सेड्युल पनि आइसकेको बताए । ‘फ्लाईट सेड्युल पनि आईसकेको छ, असोज १ गतेबाट सेवा शुरु हुन्छ ।’ कुँवरले भने । यात्रुहरुको चाप अत्यधिक बढ्दै गईरहेको भन्दै कुँवरले गुण एयर सञ्चालनमा आएसँगै यात्रुहरुलाई केही राहत मिल्ने बताए ।
असोज १ गते बिहान साँढे १० बजे काठमाडौंबाट भरतपुर उडान हुने समय तालिका रहेको छ । पछि समयतालिका हेरफेर गर्न सकिने बताइएको छ ।
