ताप्लेजुङ । ताप्लेजुङमा गत हप्तादेखि नयाँ मूल्यमा अलैंची खरीदविक्री शुरू भएको छ । अलैंचीको नयाँ उत्पादन (फसल) बजारमा आउन थालेसँगै कारोबार मूल्य गतवर्षको भन्दा धेरै रहेकाले किसान तथा व्यवसायी उत्साहित छन् । पछिल्ला केही वर्षयता अलैंचीको मूल्य निरन्तर घटिरहेको अवस्थामा यस वर्ष शुरूमै सोचेभन्दा राम्रो मूल्य आएको बताइएको छ । केही हप्ता अघिदेखि स्थानीय बजारमा निस्कन थालेको अलैंचीको मूल्य प्रतिमन रू. ३२ हजारदेखि ३५ हजारसम्ममा खरीदविक्री भइरहेको छ ।
हाल स्थानीय बजारमा कारोबार हुन थालेको मूल्य अपेक्षा गरेभन्दा राम्रो भएकाले अलैंची किसान तथा व्यवसायी दुवैलाई उत्साहित बनाएको छ । जिल्लाकै प्रमुख नगदेबालीको रूपमा रहेको अलैंचीको नयाँ मूल्य गतवर्षको भन्दा यस वर्ष रू. १२ हजारदेखि १४ हजारसम्म बढी रहेको सदरमुकाम फुङ्लिङ बजारका स्थानीय व्यवसायी दिनेश अधिकारीले बताए । उनका अनुसार गतवर्ष नयाँ अलैंची बजारमा कारोबार हुन थाल्दा प्रतिमन रू. २० हजारदेखि २२ हजार मात्र मूल्य थियो । यस वर्ष शुरूमा आएको अलैंचीको मूल्यले किसान तथा व्यवसायी दुवैलाई सन्तुष्ट बनाएको उनको भनाइ छ ।
फुङ्लिङ बजारकै अर्का व्यवसायी भद्र रेग्मीले पनि यस वर्षको अलैंची मूल्यले किसान तथा व्यवसायीलाई उत्साहित बनाएको बताए । ‘विगतका वर्षमा प्रतिमन रू. २० हजारदेखि २२ हजारमा कारोबार हुँदै आएको अलैंची यस वर्ष गतवर्षको तुलनामा प्रतिमन १५ हजारसम्म बढी हुनु धेरै राम्रो हो,’ उनले भने । यसरी शुरूमै राम्रो मूल्य आएकाले सिजनसम्म नै राम्रो मूल्य आउने जिल्लाका किसान तथा व्यवसायीले अपेक्षा राखेका छन् ।
यता, यस वर्ष अलैंची उत्पादन भने ह्वात्तै घटेको किसानले बताएका छन् । अहिले औल क्षेत्रको अलैंची निस्कन थालेको र औल क्षेत्रमा विगतको तुलनामा आधाभन्दा धेरै उत्पादन घटेको फुङ्लिङ नगरपालिका–१ का किसान मकरजङ लिम्बूले बताए । उनका अनुसार यस वर्ष औल क्षेत्रमा सबैतिर अलैंची नफलेकाले उत्पादन घटेको छ । लेकाली क्षेत्रमा भने अलैंची फल राम्रै लागेको किसानले बताएका छन् । लेकाली क्षेत्रको अलैंची भने कात्तिकदेखि मंसिरसम्ममा निस्कने गर्दछ । रासस