कार्तिक २७, काठमाडौं ।नेपाल राष्ट्र बैंकले गण्डकी प्रदेशमा गत आर्थिक वर्षमा उद्योगहरुको क्षमता उपयोग ४० प्रतिशत मात्र रहेको बताएको छ ।
केन्द्रीय बैंकले गरेको एक अध्ययन अनुसार उक्त प्रदेशमा अघिल्लो वर्षको ती उद्योगहरुको औसत क्षमता उपयोग ३९ दशमलव ९ प्रतिशत रहेको थियो । अध्ययन प्रतिवेदन अनुसार प्रदेश नं १ का उद्योगहरुको क्षमता उपयोगको तुलनामा गण्डकी प्रदेशका उद्योगहरुको क्षमता उपयोग १३ प्रतिशत विन्दुले कम हो । गत आर्थिक वर्षमा गण्डकी प्रदेशका उद्योगहरुको क्षमता उपयोग औसत ५३ प्रतिशत थियो ।
उक्त प्रदेशमा सञ्चालनमा रहेका उद्योगहरुमध्ये औसत क्षमता उपयोगभन्दा बढी क्षमतामा सञ्चालन भएका उद्योगहरुमा चकलेट, बिस्कुट, बियर, इँटा, चुरोट, तथा खाने तेल रहेका छन् । बाँकी उद्योगहरु औसत क्षमताभन्दा कममा सञ्चालन भएको राष्ट्र बैंकको अध्ययन प्रतिवेदनमा उल्लेख छ ।
उक्त प्रदेशको कुल गार्हस्थ्य उत्पादनमा उद्योग क्षेत्रको हिस्सा अन्य प्रदेशको तुलनामा बढी छ । आर्थिक वर्ष २०७७/ ७८ मा कुल गार्हस्थ्य उत्पादनमा उद्योग क्षेत्रको हिस्सा १७ दशमलव ५ प्रतिशत रहने अनुमान छ । उक्त प्रदेशमा साना, मझौला र अनौपचारिक क्षेत्रका उद्योगहरुको बाहुल्य रहेको छ ।
मझौला खालका ४६०ओटा उद्योगहरुमा १८ हजार २८३ जना र १२ हजार ७२४ ओटा लघु उद्यममा ३६ हजार ८९९ जनाले रोजगारी पाएका छन् ।
