पोहोर यही समयमा मूलधारका धेरै अर्थशास्त्रीले सन् २०२३ र २४ मा विश्व गहिरो मन्दी (डिप–रिसेसन) मा डुब्ने भविष्यवाणी गरेका थिए । सार्वभौम ऋण विस्तारले यो चिन्ताखेती मौलाएको थियो । सार्वभौम ऋणले मुद्रास्फीति बढाउने र रोजगारी घटाउने (स्ट्यागफ्ल्यासन) गर्छ । तर पोहोर ‘गहिरो मन्दी’ छाएन । विश्वव्यापी रूपमा कुल गार्हस्थ्य उत्पादन (जीडीपी) धनात्मक नै रह्यो । ऋण अत्यधिक बढेर टाट उल्टने मुलुकहरू बढेनन् । तर संकटबाट विश्व अर्थतन्त्र टाढा छैन ।