ट्रेड एक्स्पोबारे आयोजक संस्थाका पदाधिकारी : उपभोक्ता र उद्योगी दुवैले लाभ लिने थलो

 अनुपम राठी  वरिष्ठ उपाध्यक्ष  मोरङ व्यापार संघ   एक्स्पो उद्योगी र उपभोक्ताबीच प्रत्यक्ष संवाद गर्ने थलो हो । एक्स्पोमा उपभोक्ताले उद्योगका विभिन्न उत्पादन एकै ठाउँमा हेर्न,    जान्न–बुझ्न र किन्न पाउँछन् । उद्योगीले पनि प्रत्यक्ष रूपमा उपभोक्तालाई भेटेर आफ्नो उत्पादनबारे प्रतिक्रिया लिन पाउँछन् ।      समग्रमा उपभोक्ता र उद्योगी दुवैले उच्चतम लाभ लिने ठाउँ हो एक्स्पो । कोभिडका कारण लामो समयपछि मेला आयोजना   भएको  छ ।  यो अवधिमा उपभोक्ताले उत्पादनहरूमा आएको नयाँपनका बारेमा थाहा नपाएका हुन सक्छन्, जसबारे यो एक्स्पोमा     जानकारी लिन सकिन्छ । स्टलहरूमा नेपालमै उत्पादित वस्तु धेरै छन् । एक्स्पो उद्घाटनपछि पनि स्टलका लागि ३८ ओटा संस्था/   कम्पनी प्रतीक्षामा रहनुले यसप्रतिको आकर्षण बढेको देखाउँछ । हामीले अब स्थायी प्रदर्शनीस्थलको निर्माणमा जोड दिनुपर्छ । प्रदेश, संघीय सरकारले विराटनगरमा एउटा स्थायी प्रदर्शनीस्थलको निर्माण गर्न आवश्यक छ । किनकि प्रत्येक वर्ष डोम र प्रविधिका लागि बाहिरी देशको भर पर्नुपर्छ । छोटो अवधिमा मेला आयोजना भएको भए पनि सबैको साथले थप उत्साह थपेको छ ।  एक्स्पोले उद्योगी र उपभोक्ता उत्साहित छन् अमित राठी कार्यकारी सदस्य मोरङ व्यापार संघ  विराटनगरको उद्योग व्यापारलाई उपभोक्तासँग जोड्न एक्स्पोको आवश्यकता निकै अगाडिदेखि महसूस गरी आयोजना हुँदै आएको छ । यसपटक भने कोभिडका कारण झन्डै चार वर्षपछि आयोजना हुन पुग्यो । लामो समयपछि आयोजित एक्स्पो परिवार र साथीभाइ भेटघाटको थलो पनि भएको छ । बजारभन्दा सस्तो र धेरै प्रकारका वस्तु एकै स्थानमा पाउँदा उपभोक्ता बढी खुशी देखिएका छन । उद्योगीहरूलाई पनि सहज भएको छ । उत्पादनकर्ताले पनि उपभोक्ताको मनोभावना बुझ्ने अवसर पाउनेछन् । उनीहरूले सोहीअनुसार आफ्नो उत्पादनलाई विविधीकरण गर्न सक्नेछन् । उत्पादनकर्ता–उपभोक्ता सम्बन्ध बलियो बनाउने अवसर  आशिष जाजू  कार्यकारी सदस्य  मोरङ व्यापार संघ   कोभिडको कारण लामो समयको घर बसाइपछि युवाहरू अहिले खुलेर एक्स्पोमा आइरहेका छन् । उत्पादनकर्ताले पनि आफ्नो   उत्पादनले कसरी उपभोक्तालाई आकर्षित गर्ने भनेर विभिन्न स्किम र छूटको व्यवस्था गरेका छन् । पारिवारिक भेटघाट, किनमेल   र मनोरञ्जन थलोको रूपमा एक्स्पोमा उद्घाटनकै दिनदेखि उत्साहजनक भीड छ ।  यसले उत्पादनकर्ता र उपभोक्ताबीचको सम्बन्ध समेत सुमधुर बनाउनेछ । साथै आर्थिक गतिविधि पनि बढाउनेछ । लामो समय   लकडाउनको कारण घरमै खुम्चिएर बसेकाहरूले एक्स्पोमा मनोरञ्जनको अवसर पाएका छन् । एक्स्पोमा बञ्जी जम्प, साइक्लिङ र जिप लाइन आकर्षणका रूपमा रहेका छन् ।  राष्ट्रिय–अन्तरराष्ट्रिय कलाकारको प्रस्तुतिमा आकर्षण देवाशिष गोल्छा  कार्यकारी सदस्य मोरङ व्यापार संघ लामो समयको अन्तरालपछि आयोजित एक्स्पोले यस क्षेत्रका सर्वसाधारण उपभोक्ता, उद्योगी व्यवसायी उत्साहित छन् । घरमै बसेर काम गर्दा दिक्क भएकाहरू अहिले एक्स्पोमा रमाइरहेका छन् । परिवारले किनमेल र मनोरञ्जन गर्न सक्नेगरी एक्स्पोको डिजाइन गरिएकाले यहाँ प्रवेश गरेपछि सबैले आनन्दको अनुभूति गरेको पाएका छौं । नेपालमै पहिलोपटक १७५ भन्दा बढी राष्ट्रिय कलाकारको प्रस्तुति यो एक्स्पोमा रहेको छ, जुन सबै मेलामा सम्भव हुँदैन । यस्तै भारतका जयपुर, दिल्ली, मुम्बई र कोलकातासम्मका कलाकारले प्रस्तुति दिइरहेका छन् । यसपटक विराटनगरमा नयाँ एसीसहितको डोम ल्याएर अर्काे ऐतिहासिक काम गरिएको छ । एक्स्पो सफल बनाउन अहोरात्र लागिपरेका छौं । हाम्रो उद्देश्य प्रदेश १ र विराटनगरवासीको मुहारमा खुशी ल्याउनु नै हो ।  वस्तु खरीदविक्री तथा औद्योगिक प्रविधिबारे बुझ्ने माध्यम  पवन राठी  कार्यकारी सदस्य  मोरङ व्यापार संघ  मेलामा आम स्थानीयको उत्साह हेर्दा करीब ५० करोडको कारोबार हुने अनुमान गर्न सकिन्छ । लामो समयपछि जमघट गर्ने र   साथीभाइ, परिवारबीच रमाउन एक्स्पो साझा थलो भएको छ । यो मेलाको प्रवेशद्वार नै ‘लण्डन ब्रिज’ बनाइएको छ । त्यसले   मानिसलाई प्रवेश गर्दा नै विदेशमा गएको जस्तो अनुभूति दिनेछ ।  यस्तै ‘बुर्ज खलिफा’, ‘बुर्ज अल अरब’ र ‘सेन्ट वेसिल’का प्रतीक   आकर्षण बनेका छन् । एक्स्पोले खरीदविक्री तथा औद्योगिक   प्रविधिको बारेमा बुझ्ने अवसर समेत दिनेछ । एक्स्पोले स्थानीय बजारलाई चलायमान बनाउँछ दिपेश सुवेदी  कार्यकारी सदस्य मोरङ व्यापार संघ एक्स्पो मुख्य रूपमा वस्तु तथा उत्पादन खरीदविक्री गर्ने थलो बनेको छ । यसले स्थानीय बजारलाई पनि चलायमान बनाउँछ । आर्थिक व्यावसायिक क्रियाकलाप हुने भएकाले समग्र अर्थतन्त्रमै यसको सकारात्मक प्रभाव पर्नेछ । एक्स्पोमा नयाँ नयाँ औद्योगिक उत्पादनबारे जान्ने–बुझ्ने अवसरले उपभोक्ता लाभान्वित हुनेछन् । मनोरञ्जनको थलो पनि भएकाले यसमा सबैको आकर्षण देखिएको छ । वर्षेनि यस्तो एक्स्पो आयोजना हुनुपर्नेमा विगतका केही वर्ष कोभिडका कारण गर्न सकिएन । अवस्था सहज भएमा आगामी दिनमा पनि एक्स्पोलाई निरन्तरता दिनेछौं । एक्स्पोले विराटनगर मात्र नभएर प्रदेश १ कै आर्थिक व्यावसायिक सम्भावनाको उजागर समेत गर्नेछ ।