चैत १९, काठमाडौं । राष्ट्रपति विद्यादेवि भण्डारीले उद्योगले अहिले माग अनुसार विद्युत् नपाउनु चिन्ताको विषय भएको बताउनुभएको छ ।
काठमाडौंमा शनिवार आयोजित हिमालयन हाइड्रो एस्पो २०२२ लाई सम्बोधन गर्दै राष्ट्रपति भण्डारीले जलविद्युतको अपार सम्भावना भएको देशमा उद्योगले आवश्यकता अनुसार विद्युत पाउन सक्ने वातावरण मिलाउनु पर्ने बताउनुभयो ।
‘आयात गरिएको विद्युतले केही सहज भएको भएपनि त्यसलाई सन्तोषजनक मान्न सकिन्न । विद्युत् उत्पादन र खपतको सन्तुलन मिलाउन आवश्यक छ’, राष्ट्रपति भण्डारीले भन्नुभयो ।
विद्युत् क्षेत्रमा नयाँ प्रविधि र खोज गर्न आवश्यक भएकाले यसतर्फ ऊर्जा व्यवसायीले ध्यान दिनु पर्ने उहाँको भनाइ थियो । विद्युतको विकासले समृद्ध नेपाल सुखी सम्भव भएकाले त्यसतर्फ व्यवसायी र सरकारी पक्षले पनि ध्यान दिनु पर्न उहाँले बताउनुभयो ।
ग्रामीण भेगमा विद्युतको पहुँच पुगी ग सर्वसाधारण पनि उज्यालोमा बस्न सक्ने अवस्था आएको भन्दै उहाँले निजी क्षेत्रको योगदान प्रशंसायोग्य भएको बताउनु भयो । दीगो हरित गृहतर्फ सबैले ध्यान दिनु पर्ने पनि उहाँको भनाइ थियो ।
यसैगरी वन तथा वातावरण मन्त्री रामसहाय यादवले वन मन्त्रालयसँग जोडिएका कुनै पनि विषयमा आफूले सहजीकरण गरिदिने बताए ।
उनले अर्थतन्त्रमा विद्युतको प्रत्यक्ष अप्रत्यक्ष योगदान पुर्याएर समृद्धि हासिल गर्नु आवश्यक रहेको भन्दै उनले वनजंगलसँग जोडिएका जलविद्युत् आयोजना छन् भने त्यसमा आफ्नो पक्षबाट सहजता हुने बताए ।
एक्स्पोमा जलविद्युत प्रवर्द्धक, उत्पादक, लगानीकर्ता, सप्लायर्स, बैंक, बीमा, जलविद्युतमा नयाँ प्रविधि तथा निर्माण सामाग्रीका सप्लायरसँग सम्बन्धित १०० भन्दा बढी स्टल रहेका छन् । उक्त एक्स्पो सोमवारसम्म चल्ने छ ।
