माघ ९, काठमाडौं । काठमाडौंको चावहिल चोक र मित्रपार्क गरी दुई ठाउँमा १ करोड ३० लाख रुपैयाँको लागतमा आकाशेपुल निर्माण हुने भएको छ।
चावहिल चोकमा ३३ मिटर लम्बाई र दुई मिटर चौडाईको आकाशेपुल निर्माण हुने छ भने मित्रपार्कमा १६ मिटर लम्बाई र २ मिटर चौडाइको आकाशेपुल निर्माण हुनेछ। दुई ओटा आकाशेपुलको भ्याटसहित कुल लागत १ करोड ३० लाख ४२ हजार रुपैयाँ रहेको छ।
यी संरचनाहरु तोडफोड नगरी अन्य ठाउँमा लगेर जडान गर्न मिल्ने खालको रहने छन् । निर्माण गर्न लागिएको पुलको काठमाडौं महानगरका मेयर विद्या सुन्दर शाक्य र वडाध्यक्ष शुद्धकुमार डंगोलले आइतवार शिलान्यास गरेका हुन् ।
शिलान्यासपछि मेयर शाक्यले पैदलयात्रुको भीड र दुर्घटना भइरहने ठाउँलाई प्राथमिकतामा राखेर आकाशेपुल निर्माण भइरहेको बताए।
‘काठमाडौं महानगरपालिकाक्षेत्र भित्र ट्राफिक जामको समस्या धेरै छ। सडक फराकिलो भएर पनि चावहिलमा सवारीको अधिक चाप छ। आकाशेपुल निर्माण भएपछि पैदलयात्रुको यात्रासुरक्षामा टेवा पुग्ने छ’, उनले भने।
‘चावहिलचोक र रामशाहपथमा यसअघि आकाशेपुल सञ्चालनमा ल्याइसकेका छौं। जयवागेश्वरीमा निर्माणाधीन छ।चावहिलक्षेत्रमा मात्रै हामीले ४ ओटा आकाशेपुल निर्माण गर्दैछौं’ उनले भने, ‘अन्य केही ठाउँकालागि प्राविधिक परीक्षण, नक्सा निर्माण र स्थानीयसँग परामर्श गरिरहेका छौं। केही ठाउँमा प्राविधिक समस्याका कारण काम अगाडि बढाउन कठिन भएको छ। त्यस्ता ठाउँको समाधान खोज्दैछौं।यससँगै खोला वा नदी तर्ने र वडा जोड्ने गरी पनि पैदलयात्री आकाशेपुल बनाउने योजना अघि बढाएका छौं।’
चावहिलक्षेत्रमा यातायात चाप व्यवस्थापन र पैदलयात्रीको सुरक्षा जटिल रहेको बताउँदै वडा नं ७ का अध्यक्ष शुद्धकुमार डंगोलले जतिबेलापनि सडकमा सवारी गुडिरहनुपर्ने र यात्रुहरुलाई सडक पार गर्नुपर्ने ठाउँ छानेर आकाशेपुल निर्माण गर्न लागिएको बताए।
आकाशेपुल बनाएपछि सबैलाई हिंड्न सजिलो हुन्छ। यसमा पनि बालबालिका, जेष्ठ नागरिक र स्कूलकलेजका विद्यार्थीहरुलाई धेरै राहत हुने छ वडाध्यक्ष डंगोलको भनाइ छ।
महानगरपालिकाको भौतिक पूर्वाधार विकास विभागका प्रमुख राम थापाका अनुसार ट्रष्ट र स्टील संरचनाका आकाशेपुल निर्माण भइरहेकाछन्। यी संरचनाहरु तोडफोड नगरी अन्य ठाउँमा लगेर जडान गर्न मिल्ने खालका छन्।