.jpg)
काठमाडौं। यूरोपेली संघ (ईयू)ले नेपाली वायुसेवा कम्पनीका जहाजलाई यूरोपेली आकाशमा उडाउन लगाएको प्रतिबन्ध कायमै राखेको छ । सन् २०१३ डिसेम्बरदेखि ईयूले नेपाली जहाजलाई यूरोपेली आकाशमा उडाउन प्रतिबन्ध लगाउँदै आएको छ ।
ईयूले बिहीवार उडान प्रतिबन्ध लगाएका देश र ती देशका वायुसेवा कम्पनीहरूको सूची सार्वजनिक गरेको हो । सूचीअनुसार नेपालका सबै वायुसेवा कम्पनीका जहाज यूरोपेली आकाश उड्न पाउँदैनन् । विगतमा नेपाल नागरिक उड्डयन प्राधिकरणको क्षेत्राधिकार लगायतलाई (सेवा र नियमन एउटै संस्थाले गर्न नहुने) सुरक्षा प्रतिबन्ध सूचीमा राख्नुको कारण देखाउने ईयूले यसपटक भने दुई वायुसेवा प्रदायक कम्पनीको सुरक्षा परिपालनाको कमजोरीका कारण प्रतिबन्धित सूचीबाट नहटाएको उल्लेख गरेको छ ।
प्राधिकरणका प्रवक्ता जगन्नाथ निरौलाले यसपटक पनि ईयूले सुरक्षा प्रतिबन्धको सूचीमा कायमै राखेको बताए । यसपटक ईयूले प्राधिकरणको कमजोरी नऔंल्याएको भन्दै उनले वायुसेवा कम्पनीहरूमा कमीकमजोरी देखिएका कारण उडान प्रतिबन्धको सूचीबाट नहटेको जानकारी दिए । ‘प्राधिकरणको ऐन, नियमन, नेतृत्व जस्ता कारण देखाइएको छैन । संगठन संरचना पनि ठीक छ भनिएको छ,’ निरौलाले भने, ‘ईयूले नेपाल एयरलाइन्स र श्री एयरलाइन्सको अडिट गरेको थियो । त्यसमा केही कमीकमजोरी रहेको उल्लेख गरिएको छ ।’
उनले यी दुई कम्पनीमा देखाइएका समस्या सुधारेर त्यसको प्रगति प्रतिवेदन आवधिक रूपमा ईयूमा पठाउने बताए । अब प्राधिकरणले ईयूले देखाएका कमीकमजोरी सुधार गर्न नेपाल एयरलाइन्स र श्री एयरलाइन्सलाई निर्देशन दिने उनले बताए । ईयूका प्रतिनिधिले नेपाल आएर ती कम्पनीको अडिट गरेपछि कालोसूचीबाट हटाउन आवश्यक तयारी नपुगेको प्रतिवेदन तयार गरेका थिए । उक्त प्रतिवेदनमा अडिटमा परेका नेपाल एयरलाइन्स र श्री एयरलाइन्समा सेफ्टी मापदण्ड पूरा नभएको उल्लेख गरिएको छ । नियामकले देखाएका कमजोरी र निर्देशन परिपालना नगरेको, उडान तालिका व्यवस्थापन नभएको, उडान समय सीमितता, उडान योजनालगायत कारण देखाउँदै प्रतिबन्ध यथावत् राखिएको उल्लेख गरिएको छ ।
