माघ, २६ काठमाडौं । अव काठमाडौंबाट धुलिखेल सम्म दुई ओटा हाइड्रोजन ऊर्जाबाट चल्ने बस सञ्चालन हुने भएका छन् ।
हाइड्रोजना ऊर्जाको उत्पादन र प्रयोगका लागि धुलिखेल नगरपालिका, काठमाडौँ विश्वविद्यालय र रोटरी क्लब धुलिखेलले एक समझदारी पत्रमा हस्ताक्षर गरेका छन् ।
‘ग्रिन सिटी’, शून्य कार्बन उत्सर्जनका लागि हाइड्रोजन ऊर्जा उत्पादन गरी यातायात र भान्सामा प्रयोग गर्न समझदारी पत्रमा हस्ताक्षर भएको काठमाडौं विश्वविद्यालय ग्रीन हाइड्रोजन ल्यावका प्रमुख डा विराज सिंह थापाले बताए ।
नेपालमै पहिलोपटक स्थानीय तहको अगुवाइमा यस्तो समझदारी भएको थापाको भनाइ छ ।
उक्त समझदारी पत्रमा बुधवार धुलिखेल नगरपालिकाका प्रमुख अशोक ब्याञ्जु, विश्वविद्यालयका स्कुल अफ इन्जिनियरिङ विभागका डिन प्रा डा मनिष पोखरेल र रोटरी क्लब अफ धुलिखेलका अध्यक्ष जय राईले संयुक्त रूपमा हस्ताक्षर गरेका छन् ।
समझदारी पत्रमा आगामी पाँच वर्षसम्म हाइड्रोजनको माध्यमबाट सञ्चालन गर्ने गरी दुई ओटा बस धुलिखेलबाट काठमाडौंसम्म सञ्चालन गर्ने, धुलिखेल अस्पताल तथा काठमाडौं विश्वविद्यालयको भान्सामा प्रयोग हुने एलपी ग्यासलाई विस्थापित गरी हाइड्रोजन ग्यास प्रयोग गर्ने उल्लेख छ ।
'अहिलेको लागि २ वर्षभित्र हाइड्रोजन बस चलाउने र केयू र धुलिखेल अस्पतालको भान्साबाट एलपी ग्यास विस्थापित गर्ने योजना हो', थापाले आर्थिक अभियानसँग भने, 'भविष्यमा थप के - के गर्न सकिन्छ त्यसमा पनि सहकार्य गर्ने गरी समझदारी भएको हो ।'
त्यसका लागि नगरपालिकाले नीति तथा कानून निर्माण गर्ने, रोटरी क्लवले आर्थिक संयोजन र विश्वविद्यालयले प्राविधिक सहयोग गर्ने छन् ।
