काठमाडौं । नेपालीमा एउटा उखान 'छ नि निल्नु न ओकल्नु' । अहिले जर्मन फूटवेयर तथा स्पोर्ट्सवेयर निर्माता कम्पनी एडिडाससँग भएको यिजी ब्रान्डको जुत्ताको थुप्रोमा यो उखान ठ्याक्कै मिल्छ ।
अमेरिकी र्यापर केनी वेष्टसँगको सहकार्य गएको वर्ष समाप्त भएपछि कम्पनी वेष्टको यिजी लाइनको १ अर्ब २० करोड यूरो मूल्य बराबरको जुत्ताको थुप्रोको व्यवस्थापन कसरी गर्ने भन्ने दोधारमा छ ।
यहुदीहरूविरुद्ध दिएको अभिव्यक्तिपछि वेष्टको आलोचना चुलिएपछि एडिडासले सहकार्य अन्त्य गरेको थियो । तर, यसले जुत्ताको विक्री प्रभावित नहुने आशा कम्पनीको छ ।
कम्पनीले आफूसँग थुप्रिएको जुत्ता बेचेर आउने नाफालाई परोपकारी काममा लगाउन खोजिरहेको एडिडासका सीईओ ब्योर्न गुल्डेनले बताए । जुत्ता जलाउने समेतका अन्य विकल्पचाहिँ उनले खारेज गरेका छन् ।
जुत्ताको भाउ बढेकोले यसलाई निःशुल्क बाँड्न सजिलो छैन । एक जोडी यिजी ३६० जेब्रा जुत्ता अहिले ३४० देखि ३६० डलरमा विक्री रहेको छ । चार महीना अगाडि यसको भाउ २६० डलर थियो ।
एडीडास र वेष्टबीचको करार तोडिएयता अमेरिकामा यिजीको विक्री ह्वात्तै बढेको छ । धेरैले भने जोगाएर राख्न जुत्ता किनिरहेका छन् । वेष्ट पेरिस फेसन वीकमा ‘ह्वाइट लाइभ्स म्याटर’ लेखिएको टी-शर्ट लगाएर आएका थिए । केही पछि उनले आफ्नो ट्विटर खातामा यहुदी विरोधी अभिव्यक्ति पोष्ट गरेका थिए ।
यसपछि तीन वर्षयता वेष्टसँगको सहकार्य कम्पनीले टुङ्ग्यायो । यसका कारण सन् २०२२ को अन्तिम तीन त्रैमासमा कम्पनीलाई ६० करोड यूरो घाटा भएको बताइएको छ ।
करार अन्त्यले आव २०२३ मा कम्पनीको मुनाफा कम्तीमा ५० करोड यूरो घट्ने बताइएको छ । एडिडासले जुत्ता बेच्यो नै भने पनि यसले यिजीलाई करारअनुसारको भुक्तानी गर्नुपर्नेछ । कम्पनीलाई दिएर बाँकी भएको पैसा उसले कुन प्रयोजनमा खर्चने भन्ने विचार गरिरहेको छ ।
वेष्टसँगको सम्झौता अन्त्यलाई गोल्डनले निकै दुःखद भने पनि यो सही कदम भनेको बताएका छन् । कम्पनीले थुप्रिएर बसेका जुत्ताहरूलाई के गर्ने भन्ने बारे निणर्य गरिसकेको छैन । एजेन्सी
