नेपाल इन्भेष्टमेण्ट बैंक बण्ड–२०७८ को अन्तिम किस्ता ब्याज तथा साँवा फिर्ता भुक्तानी हुने

श्रीराम सुगर मिल्सका उपकरण शिवशक्ति ग्रूपले सकार्‍यो

रौतहट। नेपाल बैंकले लिलामीमा राखेको श्रीराम सुगर मिल्स लिमिटेडका मेशिनरी उपकरण शिवशक्ति ग्रूपले सकार गरेको छ । गोल्छा र विशाल ग्रूपको लगानी रहेको उक्त उद्योगका उपकरण शिवशक्ति ग्रूपले रू. ४३ करोड ६० लाखमा सकारेको हो । उद्योगका उपकरण किन्न पाँच कम्पनीले बोलपत्र पेश गरेको नेपाल बैंकले बताएको छ ।  न्यूनतमभन्दा बढीको प्रस्ताव गरेर शिवशक्ति ग्रूपले ठेक्का सकार गरेको बैंकका प्रमुख कार्यकारी अधिकृत (सीईओ) कृष्णबहादुर अधिकारीले बताए । कबुलेको सबै रकम भुक्तानी गरेर ३५ दिनभित्र उपकरण लैजान बैंकले कम्पनीलाई सूचित गरेको छ । शिवशक्ति ग्रूपअन्तर्गतको रिलायन्स सुगर एन्ड केमिकल्स इन्डस्ट्रिज लिमिटेडले श्रीराम सुगर मिल्सको उपकरण किनेको हो । रिलायन्स सुगर एन्ड केमिकल्स इन्डस्ट्रिजमा शिवशक्ति ग्रूपसहित त्रिवेणी ग्रूपको समेत लगानी छ । यो उद्योग बारामा छ । श्रीराम सुगर मिल्सका उपकरण अर्को नयाँ मिलमा जडान गरिने शिवशक्ति ग्रूपले बताएको छ । नेपाल बैंकका अनुसार श्रीराम सुगर मिल्सले नेपाल बैंकसहित राष्ट्रिय वाणिज्य बैंक, कर्मचारी सञ्चय कोष, हिमालयन बैंक र नेपाल इन्भेष्टमेण्ट बैंक (हाल नेपाल इन्भेष्टमेण्ट मेगा बैंक) समेतबाट विभिन्न शीर्षकमा कर्जा लिएको थियो । तर, कर्जाको रकम लेनदेनसम्बन्धी लिखतमा निर्धारित भाखाभित्र बुझाउनुपर्ने साँवा र त्यसमा लाग्ने ब्याज तथा हर्जनासमेत उक्त उद्योगले बुझाएको छैन ।  उद्योगको १७ करोड रुपैयाँ ऋणको ब्याजसमेत जोड्दा २६ करोड रुपैयाँ पुगेपछि नेपाल बैंकले गत जेठ ३२ गते उपकरण लिलामीका लागि बोलपत्र आह्वान गरेको थियो । बैंकले साउन ४ गतेसम्म लिलाम बढाबढमा बोलपत्र पेश गर्न भनेको थियो । बैंकले न्यूनतम मूल्य ३८ करोड ११ हजार ७५५ रुपैयाँ तोकेर सूचना निकालेको थियो ।  यता २०७६ फागुन १३ मा सार्वजनिक सूचना प्रकाशित गरेर श्रीराम सुगर मिल्सले उद्योग स्थायी रूपमा बन्द भएको घोषणा गरेको थियो । कम्पनीले त्यतिबेला २ अर्ब १७ करोड ७५ लाख रुपैयाँ खुद घाटा पुगेको उल्लेख गरेको थियो । लगातार नोक्सानमा गएपछि गोल्छा समूहले श्रीराम सुगर बन्द गरेको हो । उक्त उद्योगमा ९१ प्रतिशत शेयर स्वामित्व संस्थापक लगानीकर्ता गोल्छा परिवार र बाँकी ९ प्रतिशत सर्वसाधारणको छ । २०४९ साउन १३ गते तत्कालीन गोल्छा अर्गनाइजेशनले स्थापना गरेको श्रीराम सुगरकोे नाममा ८० बिगाहा जमीन छ । २०७६ फागुन १३ मा सार्वजनिक सूचना प्रकाशित गरेर स्थायी रूपमा उद्योग बन्द भएको घोषणा गरेको श्रीराम सुगर मिल्सका उपकरणहरू नेपाल बैंकले लिलाम गरेको हो ।