नेपाल पुनर्बीमाको बोनस शेयर : पारित भएको तीन महिना वितिसक्दा पनि सूचीकृत भएन

वैशाख २, काठमाडौं । गत पुस २२ गतेनै पारित भएको नेपाल पुनर्बीमा कम्पनीको १६ दशमलव ५० प्रतिशत बोनस शेयर अझै सूचीकृत भएको छैन । बोनस शेयर लामो समय सूचीकृत नगरी आम लगानीकर्ताको सम्पत्ति बन्धक बनाउने काम यतिबेला नेपाल पुनर्बीमा कम्पनीले पनि गरेको छ । यस वर्ष कम्पनीको बोनस शेयरसँगै कर प्रयोजनका लागि समेत २ दशमलव ५ प्रतिशत नगद लाभांश वितरण गर्ने प्रस्ताव सोही सभाबाट पारित गरेको थियो । नगद लाभांश गत फागुनमै वितरण गरिसकेको कम्पनीले बोनस शेयर भने साधारणसभाबाट पारित भएको तीन महीना वितिसक्दापनि सूचीकरण गराउन नसकेको हो । कम्पनीका प्रमुख कार्यकारी अधिकृत शंकर रायमाझीले अर्थमन्त्रालयबाट स्वीकृति पाउनुपर्ने प्रक्रियामा ढिलाई हुदाँ सूचीकरण हुन नसकेको बताए । कम्पनीमा सरकारीतर्फको ४४ दशमलव शुन्य ४ प्रतिशत हिस्सा रहेको जानकारी दिँदै प्रमुख कार्यकारी अधिकृत रायमाझीले बोनस शेयर सूचीकरणका लागि अर्थमन्त्रालयको स्वीकृति आवश्यक रहेको बताए । सर्वसाधारणको १६ प्रतिशत र विभिन्न कम्पनीको ३९ दशमलव ९६ प्रतिशत हिस्सा रहेको कम्पनीको बोनस शेयर सूचीकरण प्रक्रिया ढिलाई भएकोमा कम्पनी पनि चिन्तित रहेको रायमाझीको भनाइ छ । अर्थ मन्त्रालयले आम सर्वसाधारण सहित कम्पनीको सम्पत्ति लामो समय बन्धक बनाउँन नपर्ने गरी जतिसक्दो चाडो बाटो खुला गरिदिनुपर्ने माग रायमाझीले गरेका छन् । कम्पनीको तर्फबाट अर्थमन्त्रालयले पुरा गर्नुपर्ने कार्यका लागि वारम्बार अनुरोध भैरहेको जानकारी पनि उनले गराए । अनुभवि लगानीकर्ता डम्बरू बल्लभ घिमिरेले नेपाल पुनर्बीमा कम्पनीको बोनस शेयर लामो समय सूचीकृत नहुँदा आम सर्वसाधारण लगानीकर्ता दोहोरो मारमा परेको गुनासो गरेका छन् । यस कम्पनीमा सर्वसाधारण लगानीकर्तासँगै बीमा कम्पनीहरूको समेत स्वामित्व रहेकाले यसबाट सर्वसाधारण लगानीकर्ता दोहोरो मारमा परेको गुनासो उनको छ । बीमा कम्पनीहरूको शेयरमा समेत आफूहरूको लगानी रहेकाले यी कम्पनीहरूको हकको बोनस शेयरसमेत बन्धक बनेको बताए । यसबाट कम्पनीहरूको नाफामा असर पर्न गई आफ्नो लगानीको प्रतिफलमा असर पर्ने अनुमान उनले गरेका हुन् । यसर्थ सूचीकरण प्रक्रियाका लागि सरोकार राख्ने निकायहरूले जतिसक्दो चाडो आवश्यक प्रक्रिया पुरा गर्नुपर्ने माग घिमिरेले राखेका छन् ।  नेपालमा पुनर्बीमा क्षेत्रका दुई कम्पनी सञ्चालनमा रहेपनि नेपाल पूनर्बीमा कम्पनी मात्र धितोपत्र दोस्रो बजारमा सूचीकृत छ । अर्को हिमालयन रिइन्स्योरेन्स लिमिटेड पनि सर्वसाधारणमा आईपीओ जारी गरी धितोपत्र दोस्रो बजारमा भित्रिने तयारीमा छ ।  नेपाल पुनर्बीमा कम्पनीले सर्वसाधारणमा आईपीओ जारीपछि पहिलो पटक यस वर्ष कुल १९ प्रतिशत लाभांश वितरण गर्न लागेको हो । कम्पनीले यस वर्षको लाभांशका लागि पुस १४ गते बुक क्लोज गरेको छ । कम्पनीको पुस १३ गतेसम्म कायम शेयरधनीको हकको बोनस शेयर तीन महीनाभन्दा बढी अवधिसम्म बन्धक बनेको हो ।  पहिलो पुनर्बीमा कम्पनीको रुपमा नेपालमा भित्रिएको यस कम्पनीले २०७६ साल चैत ४ गतेदेखि ७ गतेसम्म आईपीओ जारी गरेको थियो । पहिलो वर्ष ५ प्रतिशत बोनस शेयर वितरण गर्ने योजना बनाएको कम्पनीलाई बीमा समितिले लाभांश वितरणमा रोक लगाएको थियो । आईपीओ जारी गरेको दोस्रो वर्षको मुनाफाबाट भने कम्पनीले कुल १९ प्रतिशत लाभांश वितरण गर्ने प्रस्ताव पारित गरेको हो । आर्थिक दैनिकको प्रिन्ट संस्करणबाट