वाशिङ्टन डीसी (अमेरिका) । डिजिटल मुद्रा बिट्क्वाइनको भाउमा बुधबार उच्च वृद्धि भएको छ । अमेरिकी राष्ट्रपति जो बाइडेनलेले डिजिटल सम्पत्तिसम्बन्धी एउटा कार्यकारी आदेशमा हस्ताक्षर गरेपछि उक्त दिन बिट्क्वाइनसमेत अन्य क्रिप्टोकरेन्सीको भाउमा उच्च वृद्धि भएको हो ।
अमेरिकाका सरकारी निकायहरुले केन्द्रीय बैंकले जारी गर्ने डिजिटल डलर सृजना र अन्य क्रिप्टोकरेन्सी जारीको लाभ र जोखिमको मूल्यांकन गर्नेसम्बन्धी कार्यकारी आदेशमा बाइडेनले हस्ताक्षर गरेका थिए । यो कार्यकारी आदेशले अमेरिकी वित्तीय प्रणालीमा भर्चुअल मुद्रालाई समावेश गरिने आशा जगाएपछि लगानीकर्ताहरु उत्साहित हुँदा सोको प्रभाव क्रिप्टोकरेन्सीहरुको भाउमा देखिएको हो ।
आदेशमा अर्थ मन्त्रालय, वाणिज्य मन्त्रालय र अन्य मुख्य सरकारी निकायहरुलाई पैसाको भविष्य र यसमा क्रिप्टोकरेन्सीले खेल्ने भूमिकाबारे प्रतिवेदन तयार पार्न भनिएको छ । पछिल्लो समय तीव्र गतिमा विस्तार र विकास हुँदै गइरहेको डिजिटल मुद्रा अर्थतन्त्रलाई नियमन गर्नेतर्फ नर्वप्रवर्तनमुखी र रचनात्मक दृष्टिकोणलाई टेवा मिल्ने आशाले क्रिप्टो बजार उकालो लागेको बिटफिनेक्स ट्रेडिङले एक नोटमा भनेको छ ।
र्यान्समवेयर र अन्य साइबर अपराधको बढ्दो खतरा कम गर्न गत वर्ष ह्वाइट हाउसले क्रिप्टोकरेन्सी बजारको व्यापक निरीक्षण गर्नेबारे विचार गरिरहेको बताएको थियो । बुधबार प्रतिगोटा बिट्क्वाइनको भाउ ९ प्रतिशतले बढेर ४२ हजार २६० डलरमा पुगेको छ । यो फेब्रुअरी २६ यताकै उच्च वृद्धि हो । उक्त दिन इथर, बाइनान्स क्वाइन, लगायत धेरैजसो क्रिप्टो करेन्सीको भाउ बढेका थिए । एजेन्सी
