वैशाख १२, काठमाडौं । साताको दोस्रो कारोबार दिन सोमवार बजार खुलेको एक घण्टाको अवधिमा कारोबारमा आएका २१३ ओटा धितोपत्रमध्ये अरुण भ्याली हाइड्रोपावरको सर्वाधिक शेयर खरीदविक्री भएको छ ।
सो अवधिमा कम्पनीको रू. ४ करोड १० लाख बराबरको शेयर खरीदविक्री भएको हो । कम्पनीको शेयरमूल्य प्रतिकित्ता रू. ४३४ मा कारोबार भइरहेको छ । यो शेयर मूल्य अघिल्लो कारोबार दिनको तुलनामा २ दशमलव ८१ प्रतिशतले वृद्धि भएको हो ।
कम्पनीको शेयर आइतवार पनि सर्वाधिक शेयर खरीदविक्री भएको थियो । कम्पनीले ५० प्रतिशत हकप्रद शेयर निष्कासन गर्ने तयारीमा रहेकाले पनि सर्वाधिक शेयर खरीदविक्री भएको हो । उक्त हकप्रद शेयर निष्कासन गर्नका लागि कम्पनीले साधारण सभाबाट पारित गरिसकेको छ ।
हालसम्ममा कम्पनीले नियामक निकाय नेपाल धितोपत्र बोर्डमा भने निवेदन दिएको छैन । त्यसोत विद्युत् नियमन आयोगबाट हकप्रद शेयर निष्कासन गर्नका लागि स्वीकृती पाएपछि र धितोपत्र बोर्डमा निवेदन दिएर स्वीकृती पाएपछि मात्र हकप्रद शेयर निष्कासन गर्न पाइने छ ।
यो समाचार तयार पार्दासम्म नेप्से परिसूचक ११ दशलमव ९२ अंक बढेर २ हजार ४३२ दशमलव ८८ विन्दुमा पुगेको छ । उक्त अवधिसम्ममा कुल रू. ८१ करोड ८८ लाख बराबरको शेयर खरीदविक्री भएको छ ।
