काठमाडौँ । चौथो महाधिवेशनका वैकल्पिक पोलिटब्युरो सदस्य खम्बासिंह कुँवरको निधनप्रति नेकपा (मसाल) ले श्रद्धाञ्जली व्यक्त गर्दै शोकसन्तप्त परिवारजनप्रति समवेदना प्रकट गरेको छ ।
महामन्त्री मोहनविक्रम सिंहको हस्ताक्षरमा २०७७ माघ १४ गते जारी शोकवक्तव्यमा श्रद्धाञ्जली व्यक्त गरिएको हो ।
शोकवक्तव्यको पूर्ण पाठ यस्तो छ–
“का. खम्बासिंह कुँवरको २०७७ माघ १३ गते ९६ वर्षको उमेरमा मृत्यु भएको छ । उहाँको मृत्युप्रति हामीले दुःख प्रकट गर्दछौँ ।
का. खम्बासिंह कुँवर नेपाली कम्युनिस्ट आन्दोलनमा लामो समयदेखि क्रियाशील हुनुहुन्थ्यो । २०१९ सालपछि पार्टीमा उत्पन्न भएको असामान्य परिस्थितिमा उहाँले चितवनमा स्वतन्त्र ढङ्गले पहल गरेर एक सङ्गठन बनाई नेपाली कम्युनिस्ट आन्दोलनमा सक्रिय हुनुभयो । पछि २०३१ सालमा सम्पन्न हाम्रो पार्टीको चौथो महाधिवेशनबाट वैकल्पिक पोलिटब्युरो सदस्यमा निर्वाचित हुनुभयो । उहाँ पार्टीको अनुशासित, सक्रिय र मिलनसार कामरेड हुनुहुन्थ्यो । नेपाली कम्युनिस्ट आन्दोलनमा सक्रिय र कार्यरत रहने क्रममा उहाँको धेरैजसो सम्पत्ति पनि समाप्त भएको थियो । त्यसरी उहाँ निष्ठापूर्वक कम्युनिस्ट विचारप्रति प्रतिबद्ध रहने विरल व्यक्तित्व हुनुहुन्थ्यो ।
पाँचौँ महाधिवेशनपछि पार्टीमा भएको फुटका कारणले उहाँ र हामी एउटै पार्टीभित्र रहन सकेनौँ । त्यसरी हामीबाट उहाँ अलग सङ्गठनमा रहनुपरेको भए पनि नेपाली कम्युनिस्ट आन्दोलनको प्रवाहभित्र नै सक्रिय भएर कार्यरत रहनुभयो । हाम्राबिचमा व्यक्तिगत सम्बन्ध पनि राम्रो रहेको थियो । उहाँ बिरामी पर्दा कैयौँ पटक हाम्रो पार्टीका महामन्त्री का. मोहनविक्रम सिंहले उहाँसित भेटघाट पनि गर्नुभएको थियो । उहाँको मृत्युबाट हामीले एउटा असल मित्र र नेपाली कम्युनिस्ट आन्दोलनको निष्ठावान व्यक्तित्व गुमाएको छौँ । इमान्दारी र निष्ठापूर्वक कम्युनिस्ट आन्दोलनको बाटोमा हिड्न सकेमा नै हामीले का. खम्बासिंहको आदर्शलाई पछ्याउन सक्ने छौँ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दै सन्तप्त परिवारजनप्रति समवेदना र सहानुभूति प्रकट गर्दछौँ ।”
