बिहान उठ्नेबित्तिकै उनी घरभन्दा माथिको डाँडा र गत वर्ष पहिरोले पुरेको ठाउँ नियाल्छिन् । मंगलबारदेखि आकाशमा बादल मडारिन थालेको छ । ‘यसपालि पनि पहिरोले सताउने हो कि भन्ने चिन्ता छ,’ उनले भनिन्, ‘घर पहिरोले पुरिएपछि भाडामा बस्दै आएकी छु ।’ बुटवल–३ ज्योतिनगरकी ६८ वर्षीया कमला पाण्डेलाई पहिरो आइहाले कता जाने होला भन्ने पिरले दिनरात सताइरहन्छ । ‘कतिबेला आउँछ र बगाउँछ भन्ने पिर छ,’ उनले भनिन्, ‘प्यारालाइसिस भएका श्रीमान्लाई बाहिर निकालेर भाग्ने अवस्था छैन ।’