काठमाडौं । ५४ मेगावाट क्षमताको सुपरदोर्दी ‘ख’ जलविद्युत आयोजनाको निर्माण सम्पन्न भएको छ । पिपुल्स हाइड्रोपावर कम्पनीद्वारा दोर्दी गाउँपालिका–६ ढोडेनीमा निर्माण गरिएको आयोजनाको अहिले बाँध र डिसेन्डर परीक्षणको काम भइरहेको छ ।
आयोजनाको सबै काम केही दिनअघि सम्पन्न गरेर यतिबेला डिसेन्टरमा पानी जम्मा गर्ने कार्य भइरहेको आयोजनाका साइट इन्चार्ज रमेश सिग्देलले बताए । निर्माण सम्पन्नपश्चात् आयोजनाको इन्टेक र डिसेन्डरममा पानी राखेर परीक्षण भइरहेको छ । माघ २८ गतेदेखि आयोजनाको मुख्य सुरुङमा पानी हालेर सुरङ र अन्य संरचनाको परीक्षण गरिनेछ ।
मुख्य सुरुङको २०/२२ दिन परीक्षण गरेपछि बिजुली उत्पादन परीक्षण थालिनेछ । पावर हाउसको मेसिन जडानको काम र केबलिङको काम लगायतको बाँकी काम सम्पन्न गर्दै सम्पूर्ण निर्माण सम्पन्न गरेको यस आयोजनाको पाँच दशमलव एक किलोमिटर मुख्य सुरुङ छ । सबै गरेर १० दशमलव तीन सय ५० किलोमिटर सुरुङ मार्ग निर्माण गरिएको छ ।
आयोजनाका अनुसार भारतले गरेको नाकाबन्दी, दोर्दी खोलामा आएको बाढी पहिरो, कोरोना सङ्क्रमण, लकडाउनलगायत कारणले निर्माण अवधि लम्बिएको थियो । आयोजना कूल ८ अर्ब ८० करोड रुपैयाँ लगानीमा निर्माण कार्य अघि बढे पनि अवधि लम्बिँदा साढे १० अर्ब रुपैयाँ पुगेको छ । आयोजनामा सानिमासहित नौ बैंकले ऋण लगानी गरेका छन् । यस आयोजनामा प्रभावित क्षेत्रका जिल्लावासीको मात्र २७ करोड रुपैयाँ लगानी छ ।
विसं २०७१ मा विद्युत् खरीद सम्झौता (पीपीए) गरी विसं २०७२ असोजबाट निर्माण थालनी गरेको यस आयोजनाले सम्झौताअनुसार विसं २०७५ मा निर्माण सम्पन्न गरिसक्नुपर्ने थियो । सो निर्धारित समयमा आयोजना सम्पन्न नभएपछि समय थप गर्दै विसं २०७७ असारसम्मको सम्झौता गरिएको थियो । सो अवधिमा समेत निर्माण कार्यमा ढिलाइ भएपछि विसं २०७८ असारसम्म निर्माण सक्ने सम्झौता रहेको थियो । उक्त समय राख्दै पटक पटक म्याद थप्दै गत पुसभित्रै बिजुली उत्पादन गर्ने आयोजनाको लक्ष्य थियो ।
पानीको बहावमा आधारित यो आयोजनाको कूल ग्रस हेड ६४० मिटर रहनेछ भने वार्षिक करीब ३१ करोड ५० लाख युनिट विद्युत् उत्पादन हुने आयोजनाले जनाएको छ । आयोजनाले सुक्खायाममा ८ रुपैयाँ ४० पैसा र बर्खायाममा ४ रुपैयाँ ८० पैसामा विद्युत प्राधिकरणलाई बेच्ने सम्झौता गरिएको छ । रासस
