विराटनगर (अस) । कोरोना संक्रमणको जोखिमका कारण बन्द भएका प्रदेश–१ का चार ठूला मनोरञ्जन पार्क सञ्चालनमा आएका छन् । करोडौं लगानीका ती पार्क ६ महीनादेखि बन्द थिए । लगातार २ वर्षको कोभिड कहरका कारण मोरङ र सुनसरीका गरी चार ठूला पार्कको करीब २ अर्ब रुपैयाँ लगानी जोखिममा परेको थियो । तर अहिले यी पार्क स्वास्थ्य सतर्कता अपनाएर सञ्चालनमा आएका छन् ।
यसैबीच ४२औं विश्व पर्यटन दिवसको अवसरमा संस्कृति, पर्यटन तथा नागरिक उड्डयन मन्त्रालयले प्रदेश–१ कै सबैभन्दा ठूलो इपील्याण्ड वाटर एण्ड एम्युजमेन्ट पार्कलाई कदरपत्र प्रदान गरेको छ । इटहरी उपमहानगर–२ तालतलैया क्षेत्रमा ६ बिघा क्षेत्रमा खोलिएको यो पार्क तीन दिनदेखि सञ्चालनमा आएको सञ्चालक विनोद पौडेलले बताए ।
२०७७ फागुन १७ गते उद्घाटन गरिएको पार्क २०७८ वैशाख ११ गतेदेखि बन्द थियो । ‘अहिले कोरोना संक्रमण केही घटेपछि पार्क सञ्चालनमा ल्याएका हौं,’ उनले भने, ‘पार्कले विश्व पर्यटन दिवसको अवसरमा कदरपत्र समेत पाएकाले यसले उत्साह थपेको छ ।’ ६० करोड रुपैयाँ लगानीमा सञ्चालनमा आएको पार्कमा ७० जनाले रोजगारी पाएका छन् ।
दैनिक ५ हजार मानिसले मनोरञ्जन लिन सक्ने उक्त पार्कमा पानीसँग खेल्ने अत्याधुनिक वाटर स्लाइड आठओटा छन् । यस्तै पार्कमा एकैपटक ६ सय मानिस अटाउने एक वेभ पुल राखिएको छ । पार्कभित्र बार्बेक्यु, लन्च–डिनर, फास्ट फुड र इन्डियन फुडकोर्ट तथा आइसक्रिम पार्लरसहितका चार छुट्टाछुट्टै रेस्टुराँ छन् ।
इहहरीकै ओसियन पार्कमा ४० करोड रुपैयाँ लगानी छ । विराटनगरका सञ्जय अग्रवालले ८ वर्षअघि आफ्नै दुई बिघा जग्गामा पार्कको सञ्चालनमा ल्याएका थिए । पार्कमा स्वीमिङ पुल, वेब पुल, वाटर स्लाइड, रेस्टुराँ, सुइट रुम लगायत सुविधा छन् ।
‘कोभिड कहरभन्दा अघि पार्कमा ३५ कामदार थिए । अहिले रेखदेख गर्न पाँचजना छन्,’ सञ्चालक सञ्जयले भने । बन्द हुँदा मासिक १० लाख रुपैयाँ घाटा बेहोर्नु परेको उनले बताए । तर चाडबाड नजिकिँदै गर्दा सञ्चालनमा आएकाले केही राहत महसूस भएको उनको भनाइ छ । सुनसरीको इटहरीसँगै जोडिएको मोरङको सुन्दर हरैंचा नगरपालिकामा दुई ठूला पार्क पनि ५ महीनापछि सञ्चालनमा आएका छन् । सुन्दर हरैंचा–४ मा रहेको गोकुलम पार्कका सञ्चालक रमेश कार्कीका अनुसार निषेधाज्ञाको बेला पारेर पार्कको ‘रेनोभेसन’ गरिएको थियो ।
६ महीना बन्दमा पार्क पुनर्निर्माण, मर्मत र सौन्दर्यीकरण गरिएको सञ्चालक कार्कीले बताए । कार्कीले साढे २ बिघा जमीनसहितको पार्क तथा रिसोर्ट अढाई वर्षअरिघ २० करोड रुपैयाँमा खरीद गरेका थिए । सिजनमा वनभोज गर्न आउनेको यहाँ भीड हुन्छ । सुन्दर हरैंचा नगरपालिका–४ मा रहेको गोकर्ण पार्क पनि ६ महीनापछि सञ्चालनमा आएको छ । इटहरीका रमेश आचार्यले ४ वर्षअघि २५ करोड रुपैयाँमा २ बिघा जग्गा खरीद गरेर पार्क निर्माण गरेका हुन् । त्यसमा भौतिक संरचनाका लागि थप १० करोड रुपैयाँ लगानी गरिएको उनले बताए ।
