वीरगञ्ज। प्रधानमन्त्री पुष्पकमल दाहालले सरकारले आगामी आर्थिक वर्ष २०८१/८२ को बजेटलाई आमूल सुधार गरिने दाबी गर्नुभएको छ । अहिलेसम्मका बजेट जनहितमुखी र लोकतान्त्रिक नभएको भन्दै प्रधानमन्त्री दाहालले अबका बजेट सामाजिक न्याय र सामाजवाद उन्मुख हुने बताउनुभएको हो ।
नेकपा माओवादी केन्द्र निकट पत्रकारहरूको संस्था प्रेस सेन्टर नेपालको २०औं स्थापना दिवस तथा राष्ट्रिय परिषद् बैठकलाई सोमवार वीरगञ्जमा सम्बोधन गर्दै प्रधानमन्त्री दाहालले आगामी वर्षको नीति तथा कार्यक्रम र त्यसका आधारमा आउने बजेटलाई लोककल्याणकारी बनाउने बताउनुभएको हो । यो समानताको पक्षमा क्रान्ति नै भएको दाबी उहाँले गर्नुभयो । सरकार आगामी आर्थिक वर्षको बजेटदेखि नै यसको प्रत्याभूति हुनेगरी नीति तथा कार्यक्रम बनाउने तयारीमा जुटेको उहाँले उल्लेख गर्नुभयो । ‘बजेटको सीमा र आकारमा देखिएको असामञ्जस्य चिर्न सरकार लागेको छ । यसमा गृहकार्य भइरहेको छ । अर्को आर्थिक वर्षको बजेटमै त्यसको प्रत्यक्ष प्रत्याभूति हुन्छ,’ उहाँले भन्नुभयो ।
बजेटलाई प्रभावकारी र जनहितमा केन्द्रित गर्न सरोकारका सबै मन्त्रालयसँग सामूहिक बहस र समन्वय भइरहेको प्रधानमन्त्री दाहालको भनाइ थियो । पुराना योजना पूरा नगर्दै नयाँ नयाँ योजना ल्याउँदा प्रतिफलमा समस्या भएको उहाँले उल्लेख गर्नुभयो ।
समयसीमाभित्रै योजना पूरा गर्नेतर्फ सरकारको ध्यान केन्द्रित भएको उहाँले बताउनुभयो । सूचना र प्रविधिको क्षेत्रमा नेपालले उल्लेख्य फड्को मारेको भन्दै उहाँले आर्थिक विकासको उद्देश्यमा यसको उपयोगको आवश्यकता औंल्याउनुभयो ।
