वैशाख १८, काठमाडौं । यस वर्षको वसन्त यामको सगरमाथा (८ हजार ८४८ दशमलव ८६ मिटर) हिमाल आरोहणका लागि ३९ ओटा आरोही समूहका ३१६ जनाले आरोहण अनुमति लिएका छन् ।
संस्कृति, पर्यटन तथा नागरिक उड्डयन मन्त्रालय, पर्यटन विभागका अनुसार सगरमाथासहित २५ हिमाल तथा चुली आरोहणका लागि १११ आरोही समूहका १९५ महिला र ७०४ पुरुषसहित कुल ८९९ आरोहीले अनुमति पाएका छन् ।
विभागको पर्वतारोहण शाखाबाट जारी भएको मार्च अन्तिमसम्मको एक्सिपीडिसन पर्मिटमा सबैभन्दा धेरै सगरमाथा आरोहण गर्न ३८ आरोही समूहका ३०२ जना आरोहीले अनुमति लिएका छन् । अमादब्लम (६ हजार ८१४ मिटर) आरोहणका लागि नौ समूहका ९७ जनाले अनुमति पाएका छन् । कञ्चनजङ्घा (८ हजार ५८६ मिटर) आरोहणका लागि सात ओटा समूहले अनुमति लिएको छ ।
अन्नपूर्ण (८ हजार ९१ मिटर) चार र नुप्से आरोहणका लागि सात ओटा समूहले अनुमति पाएको छ । मकालु (८ हजार ४६३ मिटर) मा चार, धौलागिरि (८ हजार १६७ मिटर) का लागि दुई र ल्होत्से (८ हजार ५१६ मिटर) का लागि एक आरोही समूहले अनुमति लिएका छन् ।
त्यसैगरी नुप्से आरोहणका लागि सात, हिमलुङ्ग चुली र थापा पिकका लागि चार/ चार समूहले आरोहण अनुमति लिएर गन्तव्यतर्फ प्रस्थान गरेका छन् । ती हिमाल तथा पिक आरोहणबाट हालसम्म ४६ करोड ७५ लाख रुपैयाँ रोयल्टी जम्मा भएको विभागले बताएको छ । रासस
