कास्की । पोखरा महानगरपालिका–१२ ले नागरिकलाई सहज रूपमा सेवा प्रवाह गर्ने उद्देश्यले मोबाइल एप सञ्चालनमा ल्याएको छ । नागरिकलाई घरबाटै सेवा लिन सक्ने बनाउन मोबाइल एप सञ्चालनमा ल्याइएको हो ।
नागरिकलाई प्रविधियुक्त सेवा दिने उद्देश्यले तयार पारिएको मोबाइल एप बुधवार पोखरा महानगरपालिकाका मेयर धनराज आचार्यले सार्वजनिक गरेका हुन् । उक्त एपबाट इन्टरनेटको पहुँच भएका वडावासीले जन्मदर्ता, विवाहदर्ता र नाता प्रमाणितको सेवा लिन सक्छन् । एपमा जनप्रतिनिधिलाई गुनासो गर्न मिल्ने सुविधा समेत छ ।
नागरिकले प्राप्त गर्ने सेवा सहज बनाउँदै घरबाटै सेवा लिने कार्यको शुरुआत गर्ने प्रयासस्वरूप मोबाइल एपको विकास गरिएको वडाध्यक्ष सन्तोष बास्तोलाले बताए ।
‘नागरिकले सहज रूपमा घरबाटै सेवा प्राप्त गर्नेगरी एप तयार पारेका छौं । यो सार्वजनिक भएसँगै नागरिकले घरबाटै सेवाको उपयोग गर्नेछन् ।’ उनका अनुसार मोबाइल एपमार्फत वडाका सेवाबारे जानकारी दिइनेछ । मोबाइल एप परिमार्जन गर्दै छात्रवृत्तिका लागि आवेदन दिन र घरबाटै कर तिर्न सकिने व्यवस्था गरिने बताइएको छ ।
