ट्रक एवं साना–मझौला ढुवानी व्यवसायीहरुले बुटवलमा अटो भिलेज जस्तै छुट्टै ‘ट्रान्सपोर्ट भिलेज’ बनाउन माग गरेका छन् । ‘ट्रान्सपोर्ट भिलेज’ नहुँदा ट्रक तथा अन्य ढुवानीका साधनहरुले बजार क्षेत्रमै सडक अतिक्रमण गरेर सामान ओसार पसार गर्नुपर्दा बजार क्षेत्रमा ट्राफिक जामको समस्या बढेको र बजार अस्तव्यस्त बन्न पुगेको उनीहरुले औंल्याएका छन् । ढुवानीका सवारी साधनको संख्या बढ्दै गए पनि सम्बन्धित निकायले पार्किङ स्थल तथा छुट्टै स्थान नतोकि दिँदा सामान ढुवानीका लागि बजार क्षेत्रमा ट्रकहरु प्रवेश गर्दा ट्राफिक प्रहरीले विभिन्न बहानामा दुःख दिने जरिवाना असुल्ने गरेको समेत व्यवसायीको गुनासो छ ।