फागुन १९, काठमाडौं । पछिल्लो समय जीवन बीमा व्यवसायमा नयाँ बीमा कम्पनीहरुको व्यवसाय विस्तार राम्रो देखिएको छ ।
बीमा समितिले सार्वजनिक गरेको चालू आर्थिक वर्ष (आव) २०७८/ ७९ को सात महीनाको तथ्यांक अनुसार अधिकांश नयाँ जीवन बीमा कम्पनीहरुको व्यवसाय विस्तार राम्रो देखिएको हो ।
समितिका अनुसार १९ ओटा जीवन बीमा कम्पनीमध्ये ९ ओटा कम्पनीले १ अर्ब रुपैयाँभन्दा बढी प्रथम बीमा शुल्क आर्जन गरेका छन् । ती मध्ये चार ओटा नयाँ जीवन बीमा कम्पनीले १ अर्ब रुपैयाँमाथि प्रथम बीमा शुल्क आर्जन गरेका हुन् ।
सात महीनाको अवधिमा १ अर्बभन्दा बढी बीमा शुल्क आर्जन गने नयाँ बीमा कम्पनीमा सिटिजन्स लाइफ, रिलायबल नेपाल लाइफ, सन नेपाल लाइफ र युनियन लाइफ इन्स्योरेन्स रहेका छन् ।
उक्त अवधिमा सिटिजन्स लाइफले १ अर्ब ६० करोड, रिलायबल नेपाल लाइफले १ अर्ब ४८ करोड, सन नेपाल लाइफले १ अर्ब ४७ करोड र युनियन लाइफ इन्स्योरेन्सले १ अर्ब ४५ करोड रुपैयाँ प्रथम बीमा शुल्क आर्जन गरेका छन् ।
सात महीनाको अवधिमा १९ ओटा जीवन बीमा कम्पनीले कुल २३ अर्ब ३२ करोड रुपैयाँ प्रथम बीमा शुल्क आर्जन गरेकाछन् । ती कम्पनीहरुले माघ महीनामा मात्र २ अर्ब ४२ करोड रुपैयाँ बराबरको प्रथम बीमा शुल्क आर्जन गरेका छन् । नेपाल लाइफ इन्स्योरेन्सले चालू आवको माघ महीनासम्म र माघ महीनामा सबैभन्दा बढी प्रथम बीमा शुल्क संकलन गरेको छ । उक्त कम्पनीले चालू आवको सात महीनामा ३ अर्ब ८७ करोड रुपैयाँ बराबरको प्रथम बीमा शुल्क आर्जन गरेको छ ।
त्यसैगरी बढी बीमा शुल्क आर्जन गर्नेमा नेशनल लाइफ इन्स्योरेन्स रहेको छ । यो कम्पनीले माघ महीनासम्म २ अर्ब ५५ करोड रुपैयाँप्रथम बीमा शुल्क आर्जन गरेको छ भने माघ महीनामा ३३ करोड ९५ लाख रुपैयाँ बराबरको प्रथम शुल्क आर्जन गरेको छ ।
माघसम्म सबैभन्दा थोरै प्रथम बीमा शुल्क संकलन गर्नेमा गुराँस लाइफ इन्स्योरेन्स कम्पनी लिमिटेड रहेको छ । उक्त कम्पनीले चालू आवको सात महीनामा ४२ करोड ६३ लाख रुपैयाँ बराबरको प्रथम बीमा शुल्क आर्जन गरेको छ । साथै उक्त कम्पनीले माघ महीनामा मात्रै ५ करोड १२ लाख रुपैयाँ बराबरको प्रथम बीमा शुल्क आर्जन गरेको छ ।
चालू आबको सात महीनामा १९ ओटा बीमा कम्पनीले ८१ अर्ब ३० करोड रुपैयाँ कुल जीवन बीमा शुल्क संकलन गरेका छन् । साथै माघ महीनामा मात्र ती कम्पनीले १० अर्ब ३८ करोड रुपैयाँ कुल बीमा शुल्क संकलन गरेका छन् ।
स्रोत : बीमा समिति
- प्रतिक्षा कँडेलबाट
